1788/2022-2023
Aizawl, 1st September, 2022: Vawiin khan Save Chite Lui Executive Committee chu Chairman Pi Renu Sharma, IAS, Chief Secretary hovin Chief Secretary Conference Hall, MINECO-ah an thukhawm a. Chite Lui humhalh leh humhimna tura hmalakna kalpui mekte thlir hovin, Chite lui leh a chhevelte tuaithar a, tihmawina tura ruahmanna hrang hrang kalpui dan tur chungchang te sawi ho a ni.

Meetingah hian Save Chite Lui Comprehensive Action Plan siam turin North Eastern Regional Institute of Water and Land Management (NERIWALM), Tezpur chu pawm a ni a. NERIWALM hi September thla tirah Aizawlah an lokal dawn a.

Chite Lui chhehvela ram neitute intawh khawmna nei tura ruahmanna chu September thla chhunga neih turin rel a ni a. October leh November ah Chite luia bawlhhlawh leh thli luan luh theihna veng hrang hrang Local Council te, YMA, MHIP leh MUP te nen intawhkhawmna lian tham deuh buatsaih tum a ni bawk a. Heng veng hrang hrang kohhran hruaitute nena inkawmhona pawh buatsaih tum a ni.

Meetingah hian Chite Lui humhalh na atana NEDP atanga sum hmuh leh hmalakna hrang hrangte thlirho a ni a. Aizawl khawpui enkawltu AMC in khawpui thli leh hnawmhnawk danna tura hma an lak mek chu Committee chuan lawmawm a tiin Chite lui bik humhimna tur project pawh kar hnih chhunga lo buatsaih turin AMC chu ngen a ni a. Bawngkawn-Durtlang kham pang ramngaw chereu zel chu ngun taka a chhan lo zirchiang tur leh a tul anga rawtna siam turin Environment, Forests & Climate Change Department-te ruat an ni bawk.