No.115452021-2022

Dated Champhai, the 28th June, 2021: Vawiin chawhma khan Pi Maria C.T Zuali, Champhai District Bawrhsap chuan I&PR Conference Hall, CHANEM-ah Undivided Champhai District atanga Press Accreditation hmu thar mi 13 te hnenah Press Accreditation Card a hlan.

Press Accreditation Card semchhuah inkhawm DIPRO Champhai Dr.Lallawmkima kaihhruaiah Pi Maria C.T Zuali chuan Press Accreditation hmu tharte a lawmpui thu sawiin, chanchinbumite chu District hmasawnna tura theihtawp chhuahtu leh thawh hlawk berte zinga mi nia a hriat thu a sawi a. Media-in nasa taka hma a sawn thu leh mipui hawiher tidanglam dawrh thei tura mawhphurhna lian tak an neih thu sawiin, sawrkar thu leh hla puanchhuah kawngah an thawhhlawk em avangin sawrkar pawhin media mi leh sate a ngaipawimawh hle a ni, a ti a. Ram leh mipuite rawngbawlsak kawngah thawhhona tha tak neih zel a tul thu sawiin, Champhai District-a chanchinbu chhuak thinten Editorial tha tak tak, kawng dik lam hawia mipuite kaihhruaina leh District hmasawnna lam thilte an thai lang thin chu fakawm a tih thu a sawi a. Chanchinbumite chu Champhai District tana hmachhawp an neihte tihlawhtling tura theihtawp chhuaha sawrkar tawiawm tlat tur leh, department hrang hrang hmalaknate ngaihvena infinchhuah a tul hun pawha inthlahrung lova thurawn pe thin turin a chah a ni.

Thusawitu dang MJA Champhai District President, Pu Lalhmingmawia Pachuau chuan I&PR Department kaltlanga Press Accreditation Card semchhuah a ni chu lawmawm tiin, hun pawimawh tak telpuitu District Bawrhsap chungah lawmthu a sawi a. Press Accreditation Card chuan mawhphurhna lian tak a kentel avangin a vawngtu theuhten mawhphurhna hlen chhuak tura tan an lak tlan a tul thu a sawi bawk.

Mizoram sawrkar hnuaia Press Accreditation Committee thukhawmin Accredited Journalist ni thei tur a thlan zingah Undivided Champhai District atangin mi 13 an tel a, heng zinga mi 10 te hi Champhai District amite niin, 3 dangte chu Khawzawl District amite an ni. Press Accreditation Card hi kum hnih chhung a nung dawn a ni.

Vawiin Press Accreditation Card semna hun hman zawhah hian inkawmhona neih chhunzawm a ni a, Bawrhsap hovin District hmasawnna tura thil tul leh pawimawhte sawiho a ni.