2640/2022-2023

Champhai, the 13th November, 2022: Champhai District Bawrhsap Pu James Lalrinchhana chuan nimin (12.11.22) khan Vapar leh Murlen khuate tlawhin VC leh NGO te kawmna hun a hmang a; khawtlang leh sawrkar hmunhma pawimawhte tlawhin thawktute kawmin mamawh leh tul dangte a sawipui bawk.

Pu James Lalrinchhana chuan khawtlang hruaituten sawrkar hmunhma cheibawl leh enkawl kawngah neitu thinlung an pu thin chu fakawm tiin, thawhhona tha tak vawngnung zel tur leh rualelna dik nei turin a fuih a. Hmasawnna hrang hrangte ngaihpawimawh  vek a nih rualin zirna, hriselna leh infiamna kawngah hmasawnna siam tuma ngaihtuahna sen nasat zual a ni, a ti a. Zirna kawnga hma kan sawn hunah chauh hmasawnna dik leh ngelnghet kan nei thei dawn a ni tiin, zirtirtu leh khawthlang hruaitute chu harsatna awmte thuneitute hnena thlen nghal vat thin turin a chah a. Zirna tih hmasawn nan zirtirtu, nu leh pa leh zirlaite an pawimawh tlan thu sawiin, zirtirtute chu intuaithar thin tur leh nakin lawka ram leh hnam innghahna tur enkawltu an ni tih hriaa an miziate chik a, an taksa leh rilru lam dinhmun thlenga ngaihven thin tur leh puih an ngaihna zawnah inhawng reng turin a chah a. Mathematics leh Science-te chu a theih chen chenah Mizo tawng ngeia zirtir thin turin zirtirtute a chah nghal bawk a. By-heart system ringawt lo deuh, thiamna tak tak nei thei tura zirtirna kalpui thin turin zirtirtute a fuih a. Ruihhlo leh a kaihhnawih laka zirlaite an fihlim theih nan leh sual kawng an zawh loh nan an tualzal nun thlenga chik thin turte leh ruihhlo laka fihlim tura inzirtirna tam zawk neih tum turin a chah bawk.

Pu James Lalrinchhana chuan khawtlang hruaitute chu dan leh hraite zir chiang thin tur leh, sawrkar thupek leh hriattirna chhuahte tha taka kengkawha mipuite zirtir kawnga tan la turin a chah a. Dan lova thil tih ven leh man chhuah kawngah theihtawp chhuaha sawrkar tawiawm tlat turin a sawm bawk a. District nuam leh ralmuang, ruihhlo laka fihlim, intodelh, zirna, hriselna leh infiamna kawnga khawtlang leh district hmasawn siam kawnga tanrual puiah District mipuite a sawm bawk a ni.

District Bawrhsap hian a remchan dan angin  Anganwadi Centre, Health Clinic leh Thlanmualte tlawhin a enfiah a. Zirna in hrang hrangte tlawhin inenkawl dan, ei leh in dawn thin te, Nutrition Garden, SMC/SMDC chungchanga hmalaknate a enfiah bakah zirtirtu kawmin fuihna thu a sawi a. Heng bakah hian District Bawrhsap hian Govt. Fair Price Shop-te tlawhin buhfai neih dante, buk dan leh quality-te, sem chhuah dan leh e-POS Machine hnathawh dante a enfiah a. Heng bakah hian Vapar leh Murlen ramri  chungchangah khawtlang hruaitute kawmin  ramrite enfiah a ni a. He hunah hian khawtlang hruaitute chu hmasawnna tura hmalak tulte leh Electoral Roll Revision kalpui mek chungchanga pawimawhte zirtir an ni bawk.

District Bawrhsap Pu James Lalrinchhana hi Pi Esther Leihang, DLAO; Dr. Lallawmkima, DIPRO; Pu Moses Lalfakawma Tlau, SDC leh Dr. Vanlalnunpuii Ralte, SDC te'n an tawiawm a ni.