2641/2022-2023
Siaha, the 13th September, 2022: Nimin ni (12.11.2022) chawhma dar 10:30Am khan Siata khua-ah Langnechhe Kut,2022 chu ropui leh ursun taka hman a ni.

He hun hi Pu John VT. Hniehu chuan kaihhruaiin, mipui Kut chhim tura kal te chawnglawmna thu a sawi. Pu Lalsangliana, Deputy Commisioner, Siaha chu khuallian atan hman niin, Pu PP. Zalena, President MTP General Headquarters, Siaha chu khualzahawm a ni.

Rev. Robin MH.Lalthanmawia'n hunserh a hman zawhah, Joint Village Organization, Siata ten mawi takin Opening Song an sa a.
Pu C.H. Nihmung chuan Langnechhe a lo chhuah dan leh an lo hman thin dan report pe bawk.

He Kut hmanpuitu Pu Lalsangliana chuan thusawina hun hmangin Langnechhe lawmna hun kan hman hian Mara hnam lam chi hrang hrang leh incheina te chawinuna awm zel theih nana hmalakna pakhat a ni piah lamah kan Kut neih te pawh min hlut tir thiam zual zel ngei ka beisei tlat a ni, a ti a. Kum hnih dawn covid avangin kan nunphung a buai a, Langnechhe Kut pawh hun rei tak kan hman theih tawh loh hnuah vawiinah hmang leh thei a kan awm hi a lawmawm tak zet a. Kut lo chhimtu zawng zawng ten hlim taka hmang theuh turin ka duhsakna sangber ka hlan che u a. Langnechhe Kut hi Inremna ni a nih tih vawiin a helai a lo kal zawng zawng ten hre thar leh i la, Langnechhe hi inremna ni a nihna angin mitin te inrem tak leh hlim taka hun hmang theuh turin ka sawm bawk che u a. He Langnechhe kut kan lawm hian hnam intodelh leh hnam taima kan nih zia a thar in min hriat nawm tir leh mawlh rawh se, a ti.

Khualzahawm Pu PP. Zalena, President MTP General Headquarters, Siaha pawhin thusawina hun hmangin, Langnechhe Kut hmang tura lo kal zawng zawng te hlim taka hun hmang theuh turin Kut chhimtu te duhsakna leh lawmpuina thu a hlan hlawm a ni.

Nimin Kut lawmnaah hian Hnam lam hmuh nawm tak MTP Sub-Hqrs Chakhei, Refugee Students,Peace Memorial High School, Siata, Gov't Vuangtu Middle School,Siata, Sanghe Middle School, Siata te bakah skit show MCHP Br. Siata ten an entir a. Programme karlakah zaithiam tak tak ten zaiin mipui an awi reng bawk a ni.

He kut lawmna hi thuang hniha then niin, 2nd session hi LC Muankunga leh Nula M. Lalremsangi ten an kaihhruai ve thung a ni.

Langnechhe Kut lawmna-ah hian hnam ziarang infiamna chi hrang hrang a lawmman dawngtu zawng zawngte hnenah khuallian hian lawmman a sem nghal bawk a ni.