2642/2022-2023

Aizawl 13th November, 2022 : Vawiin khan Health Minister Dr R. Lalthangliana hovin, Delhi Mizoram House Conference Hall-ah, Zoram Medical College leh AIDS Healthcare Foundation (AHF), Los Angeles, USA ten kumin September Ni 27 a thawhhona thuthlung an ziah bawhzuiin meeting an nei. 

Meeting-ah hian  Mizoram ah HIV/AIDS a darh zau tawhzia, mipui vantlangah a darh nasat tawhzia te sawilan a ni a. HIV/AIDS do zel dan tur leh mipui vantlangah tam zawka test kalpui theih dan tur te sawiho a ni a, NGO hrang hrang leh School leh College te nena thawhho theih dan tur te sawi a ni bawk. Raipuar HIV positive te enkawl dan tur chungchangah AHF te nena thawhho theih dan te sawiho a ni a, thawhho theih ngei pawh an inbeisei a ni. Meeting-ah hian AIDS Healthcare Foundation ten Girls Act lama an hmalak dan chanchinte ngaihthlak a ni a, hmeichhe naupangte HIV laka an him dan tur leh hriselna leh zirna lama an changkan zel theih nana hmalak dan tur te pawh sawiho a ni bawk. 

Vawiin meeting-ah hian AHF aiawhin Ms. Terri Ford, Chief of Global Advocacy, Policy & Marketing leh Mr. Lyle Honig, Chief Financial Officer, AHF & Bureau Chief India, Dr Sam Prasad, Country Program Director India Cares te an tel a, Minister hi Health Department atangin Dr Eric Zomawia Mission Director NHM, Dr Lily Chhakchhuak Deputy Director & STO RCH leh Zoram Medical College atangin Dr Jane Ralte Registrar, Dr Sangzuala Assistant Professor ten an tawiawm a ni.