3945/2022-2023

Champhai, the 22nd March, 2023: Vawiin tlai dar 4:30 khan Champhai District Bawrhsap Pu James Lalrinchhana chuan NHIDCL hmalaknaa Chhungte khaw ram NH 06 kianga View Point Tower sakna tur lungphum a phum.

View Point Tower hi NH 06 kawng package III siam mektu Shri Balaji Construction Company (SBCC) chuan an siam nghal dawn a. Cheng nuai 140 senna tur niin, View Point Tower hi zopa chhiarin chhawng 5, metre 16 a sang a ni dawn a. Tower bakah hian a enkawltu tur awmna te, mipa leh hmeichhe inthiarna turte leh motor park-na turte a awm tel dawn bawk a. NH 06 siam zawh ruala hawn hman tura ruahhman a ni bawk.

Ministry of Tourism kaltlangin Assistance to Central Agencies for Tourism Infrastructure Development hnuaiah NHIDCL hian View Point Tower NE State 6 a sakna tur a hmuh atangin Mizoramah pawh 9 lai sak a ni dawn a. Sak zawh a nih hunah State Tourism Department-in a enkawl chhunzawm dawn a ni.

View Point Tower sakna tur lungphum zawhfel a nih hnu hian Champhai District Bawrhsap chuan NH06 kawng siam meka hmalaknate enfiahin metre 60 a thui khawchhak Tuipui leidawh mek pawh a tlawh nghal a. Company hotute chu leilung tichhe lo zawng leh dan zawm chung zela hma la turin a chah a; leivung paihna Spoil Bank-ah chauh paih tur leh leitawlh zel tur venna gabion wall leh tul dangte ngai pawimawh turin a hrilh a. Thing leh lei hamtang thei tur hnim lamte phun uar turin a chah bawk a. Hun bituk chhung ngeia hna tlo leh tha tak zo hman thei tura theihtawp chhuah turin a chah nghal bawk.

He hunah hian NHIDCL atangin Pu Ajay Veer, Consultant, Pu Abhisek Singh, Project Manager leh hotu dangte, Pu PL Dhiman, Project Manager, Shri Balaji Construction Company (BCC) leh Company hotu dangte bakah NGO leh khawtlang hruaitute an tel a ni.