2452/2022-2023
Champhai, the 27th October, 2022: Champhai District Bawrhsap Pu James Lalrinchhana chuan vawiin khan Zawlsei leh Khuangthing khuate tlawhin VC leh NGO te kawmna hun a hmang a, khawtlang leh sawrkar hmunhma pawimawhte tlawhin thawktute kawmin mamawh leh tul dangte a sawipui bawk. District Bawrhsap hi DLAO Pi Esther Leihang leh DIPRO Dr. Lallawmkima te'n an tawiawm a ni.

Champhai District Bawrhsap chuan khawtlang hruaituten sawrkar hmunhma cheibawl leh enkawl kawnga neitu thinlung an pu thin chu fakawm tiin, thawhhona tha tak vawngnung zel turin a fuih a. Zirna ti hmasawn turin District Education Committee-in hma a lak chhoh mek zel thu tarlangin, District chhunga zirna in hrang hrangte a tahtawla tlawh zel tum a ni, a ti a. Zirna tih hmasawn nan zirtirtu, nu leh pa leh zirlaite an pawimawh tlan thu sawiin, zirtirtute chu intuaithar thin tur leh nakin lawka ram leh hnam innghahna tur enkawltu an ni tih hriaa an rilruah rualelna dik tuh tum tur te, an mamawh khawp thiamna leh midangte el pha thei tur zirtirna pek tum turtein a chah a. Mathematics leh Science-te chu a theih chen chenah Mizo tawng ngeia zirtir thin turin zirtirtute a chah nghal bawk a. Ruihhlo leh a kaihhnawih laka zirlaite an fihlim theih nan leh sual kawng an zawh loh nan an tualzal nun thlenga chik thin turtein a chah bawk.

Pu James Lalrinchhana chuan khawtlang hruaitute chu sawrkar thupek leh hriattirna chhuahte tha taka kengkawh tur leh mipuite zirtir kawnga tan la turin a chah a. Dan lova thil tih ven leh man chhuah kawngah theihtawp chhuaha sawrkar tawiawm tlat turin a sawm bawk a. District nuam leh ralmuang, ruihhlo laka fihlim, intodelh, zirna, hriselna leh infiamna kawnga khawtlang leh district hmasawn siam kawnga tanrual puiah District mipuite a sawm bawk a ni.

District Bawrhsap hian a remchan dan angin Anganwadi Centre, Health Sub-Centre leh Zirna in hrang hrangte tlawhin inenkawl dan, ei leh in dawn thin te, PM Poshan, Nutrition Garden, SMC/SMDC chungchanga hmalaknate a enfiah bakah zirtirtu leh zirlaite kawmin fuihna thu a sawi bawk.

Heng bakah hian District Bawrhsap hian Govt. Fair Price Shop-te tlawhin buhfai neih dante, buk dan leh quality-te, sem chhuah dan leh e-POS Machine hnathawh dante a enfiah a, Antyodaya Ana Yojana (AAY) hamthatna dawngtute pawh a kawm nghal bawk a. Heng bakah hian Zawlsei leh Khuangthing ramri pawh tlawhin, ramri chungchanga buaina awmte dan hnuaia chinfel anih theih dan turte khawtlang hruaitute nen enfiahin a zawtchiang nghal bawk a ni.