2451/2022-2023
Darzo, 27th October, 2022: Vawiin khan School Education Minister Pu Lalchhandama Ralte chuan Darzo-a Liandala Run-ah khuallian niin MZP Assembly vawi 66-na a hmanpui.

School Education Minister chuan MZP Assembly-ah hian thu sawiin National Education Policy-2020 (NEP-2020) in a ngaih pawimawh chu skill development a ni tih sawiin themthiamna leh infiamna te chu zirna pangngai ang chiaha kalpui a ni dawn a, zirna hmel thar a lo lang dawn a ni a ti.

Minister chuan vawiin October 27 hi Zirlaite Ni a ni tih sawiin he ni pawimawh pual hian Zirlaite chu ruihhlo, HIV/AIDS laka inthiarfihlim turin a chah a, heng hri tha lo hian Mizo zirlaite chu Mizo fahrin manhla nihna kawng a dal a ni a ti. Minister chuan Mizo zia aia upa zahna chu kan bosan ta lek lek tih sawiin kan hnam nunphung kawng hrang hrang leh social media-ah te pawh aia upa te zahna lantir thar turin a fuih bawk.

Minister chuan rual u te zirna tha lo zawk nen All India service-ah an inziak tling a, tunah chuan Mizo hming a lang khat ta chu ram tan a fel lo tih sawiin khua kan tlai hma hian ram mamawh chhanna ni turin zirlaite chu a fuih a ni.

 MZP Assembly Darzo a neihah hian Mizoram hmun hrang hrang atangin palai in report 708 an awm a, MZP General Hqrs.,  Sub-Hqrs, Branch hruaitute leh College zirlaite an kal khawm a ni.