Vawiin khan Champhai District Bawrhsap thar Pu S.L Naveen, IAS chuan  Champhai District chhunga  Chanchinbumi, NGO leh Village Council hruaitute  DC Conference Hall-ah inhmelhriattawnna neihpuiin a kawm.

Pu S.L Naveen chuan district thuneihna leh rorelna kalpui hna chu Bawrhsap kutah chauh a awm  loh thu sawiin, kan zavaia thawhhona leh inntawiawmnaah thui tak a innghat a, tha taka thawkho zel tur kan nih inhriain mipui vantlang rawngbawlna kawngah pheikhai rual takin kan pen ho zel tur a ni,  a ti a. Mizo khawtlang nun chuan Mizote khawsak inrelbawlna kawngah kawngro thui tak  a sut thu leh hmun dang pawha an neih ngai lem loh Civil Society pawimawh tak awm chu vanneihthlak a tih thu a sawi a. Champhai hmun a rawn thlenin Chanchinbumi, NGO leh VC  ten  khawtlang tana hmalakna leh hmathlir thui tak an neih a hriat thusawiin, chhawmnung zel thei tura thawhho angai a ni, a ti a. Bawrhsap chuan Chanchinbumite leh khawtlang hruaitute   chu ram leh hnam rawngbawlna kawnga Sawrkar thawhpuitu an nih inhre thar leh a, mamawh leh rawtna an neihte inthlahrung hauh lova a hnen a thlen thin turin a chah nghal a ni.

He hunah hian Chanchinbumi, NGO leh VC aiawhten Bawrhsap thar lawmpuina thusawiin, Champhai District hmasawnna leh thanzelna tur kawngah tha taka tawiawm tlat an tum thu an sawi a. District mamawh leh harsatna an neihte a  hnenah thlenin Bawrhsap chuan a theihna chen chenah a tul anga lo bawhzui zel a tum thu a sawi a ni.

He hunah hian Bawrhsap hi Pu Lalnunfela Chawngthu, Election Officer leh Dr. Lallawmkima DIPRO ten an tawiawm a ni. Champhai District Bawrhsap thar Pu S.L Naveen, IAS (AGMUT: 2012) hian   November Ni 4, 2019    khan   Champhai Bawrhsap mawhphurhna hna hi a chelh tan a ni.  

Attachment

  • Loading attachment...