Khawzawl District lawmna inkhawm vawiin khan Khawzawl Field No.1 ah buatsaih a ni a. Chief Minister Pu Zoramthanga chuan khuallian niin he hun hi a hmanpui. Deputy Chief Minister leh bialtu MLA ni bawk Pu Tawnluia chu khualzahawm a ni a. District lawmna inkhawmah hian Assembly Speaker Pu Lalrinliana Sailo, Minister Pu C. Lalrinsanga, Pu Lalruatkima, Dr. K. Beichhua te leh MLA Dr. Z.R. Thiamsanga, Pu Zothantluanga, Pu L. Thangmawia leh Pu C. Lalmuanpuia te an tel a ni.

Chief Minister chuan Khawzawl District tihpuitlin a ni chu a lawm a ni tih sawiin, district thar mipuite duhsakna chibai a buk a. Sawrkar in a tum angin district function tir in, chumi hnu ah kawng chi hrang hrangin hmalakna chhawp chhoh zel a ni tiin Pu Zoramthanga chuan tihpuitlin ngai te tipuitling tura bawhzui zel a nih thu a sawi a. Khawzawl leh district thar dang pahnih ah te chuan sawrkar building hrang hrang leh thawktute tihfel chhoh mek a nih thu leh hmabak dang la awm zawng zawng te pawh theihtawp chhuah a  tihfel a nih tur thu a sawi a. Khawchhak lamin kawng tha an mamawhna a hriatpui thu Chief Minister chuan sawiin, sawrkarin kawng tha a awm theih nan theihtawpin hma a lak thu a sawi bawk.

Chief Minister chuan Pathianin malsawmna min pek, kan hriatchhuah zawh loh, la tam si hi kan hman tangkai thiam a tul a ni, a ti a. Leilung tha, a chhung a chengte chawm zo ram zau tak, boruak thianghlim, sik leh sa nuam tak ram kan neih hi kan hman tangkai theih chuan ei leh inah intodelhna a thlen bakah chhungtin sum lakluh a pun phah dawn a ni, a ti a. Chumi atan chuan mipui kan inbuatsaih a, kan thlir thiam a pawimawh a ni, tiin ram tana thawh puiah kalkhawmte a sawm a. Khawzawl district chuan hma a sawn zel a duhsak thu a sawi bawk.

Khualzahawm Pu Tawnluia, Deputy Chief Minister chuan hun rei tak district nihna chang tura hmalakna in a taka hlawhtlinna a hmu ta chu a lawm thu sawiin, sawrkara minister leh department hrang hranga thawktuten a tul anga Khawzawl district hmasawnna atan neitu nihna thinlung pu chunga hma an lak naah lawmthu a sawi bawk a. District thar lawmna ah district tihchangtlun nana hmalakna kalpui tura department hrang hrang hotute an tel chu lawmawm a tih thu sawiin phurawm zual a tih thu a sawi. Deputy Chief Minister chuan district nihnaah duhtawk mai lovin, hmalam khawhkaitirtu ni zawk se tiin, Khawzawl district chu district thang duang tak leh kawng hrang hranga district dangte tana entawn tlak ni turin, khawtlang hruaitute leh mipuite chu tan la tlang a thawhhopuiah a sawm a ni.

Assembly House Speaker Pu Lalrinliana Sailo leh Agriculture Minister Pu C. Lalrinsanga te pawhin District thar lawmpuina thu an sawi a, hmasawnna tha hmuh a nih zel theih nan duhsakna an hlan bawk a ni.

Khawzawl district thar lawmna inkhawm hi Pu K. Lalzika, Khawzawl District Celebration Committee Chairman chuan a kaihruai a. KDCC Secretary Pu Lalzuiliana Ralte chuan Khawzawl district tihpuitlin nana hmalakna te report pe in, Khawzawl district tih puitlin nana theihtawp chhuahtu mi 7 te chawimawi an ni bawk. Khawzawl district bawrhsap Pu H Lianzela chuan kalkhawmte lawmna thu a sawi a, Prominent Citizen Pu Lalhmingthanga hnen atangin thusawi ngaihthlak ni bawkin, hnam lam leh zaipawl zai te ngaihthlak a ni a, Khawzawl veng 14 ah district thar lawmna ruai buatsaih a ni a. Vawiin district lawmna inkhawmah hian sawrkar department hrang hrang hotute an tel bawk a ni.