Champhai District Bawrhsap thar Pu S.L Naveen, IAS chuan vawiin khan Champhai District chhunga sawrkar department hrang hrang hotute DC Conference Hall-ah inhmelhriatna neihpuiin a kawm.

Pu S.L Naveen chuan Champhai chu hmun mawi leh nuam tak,  ami chengte pawh ngainatawm tak an ni, a ti a. Mipuite rawngbawl sak tura awm sawrkar department hrang hrangte chu Champhai district hmasawnna leh kalzelna turah theihtawp chhuaha tawiawm turin a ngen a. Department hrang hrang inkarah thawhhona tha leh hnathawh kalphung inhriatsaktawn a pawimawh thu sawiin, department hotute chu mahni hna theuha rinawm taka thawh mai bakah department dangte hnathawh leh hmalaknate hriatpui ve thin turin a chah a. Department tinte chu an hna kalpui mek, hmachhawp neih leh harsatna awmte tlang taka  hrilhhre thin  turin a chah nghal bawk a ni.

He hunah hian department hrang hrang hotute hnen atangin hmalakna pawimawh zual leh hatsatna neihte ngaihthlak a ni a. Bawrhsap thar duhsakna hlan niin, a kaihhruaina hnuaiah Champhai District-in hma  a sawn zel theihna turin, inpawhtlanna  leh thawhhona tha vawngnung zel a tul thu tarlan a ni.

Vawiin Meeting-ah hian Champhai District chhunga Department hrang hrang hotute an kal kim hle a ni. Champhai District Bawrhsap thar Pu S.L Naveen, IAS (AGMUT: 2012)  hian nimin November Ni 4, 2019 (Thawhtanni)  khan  a hna thar hi a rawn zawm a. Hemi hma chiah hian Director, Transport Department, Government of Mizoram hna a chelh a ni.