No.7456/2020-2021 

Vawiin khan Pi Maria C.T. Zuali, Deputy Commissioner, Champhai District chuan Selam, Lungphunlian leh Tualcheng khua te tlawhin ei leh bara intodelh nana hmalak theihna hrang hrang te line Department Official te nen an sawipui.

Hemi hnu hian Tualcheng Se vulhtute hman tur Fostering Climate Resilient Upland Farming System in the Northeast (FOCUS) project first installment kaltlanga A.H & Vety. Department, Champhai District, FOCUS Project hnuaia hmalakna ‘Mithun Shelter-Community Level and Water Supply Facility for Grazing Area’ hnuaia Se In sak, a vengtute chawlhbuk sak leh tuipekna siamte hman theih turin a hawng bawk a ni.

Pi Maria C.T. Zuali chuan ei leh bar tharchhuah kawnga intodelh a pawimawh thu sawiin, mipuite chu rinawm leh taima taka thawk thin turin a fuiha. Engkimah sawrkara innghat mai lova mahni kutke a din  hram hram tum tura fuihin, an mamawhna zawnah Department lama thawktute an inpeih reng dawn thu a sawi a. Mizote nuna Sial a behtlat avangin Sial vulh kawngah leh mamawh angte dap kawngah chak taka tanlak mek zel a ni, a ti a.  Mahni eikhawp mai bakah hralhchhuah tham buh leh bal thar tum tura chahin hmanhmawh vut vut lova teirei peih turin a chah a.  Khaw kar kawng  siam mekte duat taka enkawl tur leh faina leh hriselna kawnga tanla lehzual turin a chah nghal a ni.

Bawrhsapin vawiina a tlawh tak  khuaahte hian Alu, Vaimim leh thlai dangte chinga zau zawka hmalak tum a ni a. In 235 vel awmna Selamah Alu ching tum In 76 an in report tawha, In 80 awmna Lungphunlianah Vaimim ching tum In 30 vel an in report tawh a ni.
Undivided Champhai district chhungah Sial vulh khaw 20 an awma, heng zinga khaw 10 thlan hmasakahte FOCUS project kaltlanga Sial vulh tanpuina leh chhawmdawlna pek an ni. A.H & Vety Department chhinchhiah danin Tualcheng khuaah hian Sial vulh chhungkaw 20 vel awmin, Sial 130 bawr vel an vulh mek a ni.

Pi Maria C.T. Zuali hi Pu R.Lalnghakliana PD, DRDA, Pu George Lalthanngura DAO & DPM FOCUS, Dr. B.Zonghinga DVO, Pu R.L Peka DHO,  Dr. Lallawmkima DIPRO, Dr. Lalsawithuama CVO, Dr. P.L Lalruatfela VO Hnahlan  leh Dr. M.S Dawngliana VO Champhai te'n an tawiawm a ni.