No.718/2021-2022

Dated Champhai, the 28th May, 2021: Covid-19 vei, natna langchhuak em em lo te khawtlang buaipuia sawrkar phalna kaltlanga enkawlna hmun, Community Covid Care Centre (CCCC/4C), Champhai khawpui chhunga din a nih theih dan tur leh raltlan haw chungchangte relin vawiin chawhnu khan Bawrhsap Pi Maria C.T Zuali hovin DC Conference Hall-ah meeting neih a ni.

Pi Maria C.T Zuali chuan Covid-19 hrikai pung chho zelah sawrkarin inenkawlna hmun a siamte indaihloh theih a nih avangin sawrkar pawmpui leh khawtlang enkawl ni bawk Community Covid Care Centre/4C lo inruahman lawk a tul a ni, a ti a. 4C hman kher ngai lo tura tanlak chhunzawm zel a ngaih thu pawh sawiin, VLTF leh District mipuite theihtawp chhuaha thawhhopuizelah a sawm a. Inkharkhip hman pawhsei zel avanga chhuanchham mai thei dinhmuna dingte chhawmdawltu zawng zawngte chungah thinlung takin lawmthu a sawi bawk.

Meeting-ah hian VLTF hrang hrang atanga State pawn atanga lo hawte khunghranna Community Quarantine Centre tura hmunhma ruahmante thehlut a nih tawh thu tarlan niin, 4C tura hmunhma ruat thehlut erawh a awm fumfe mai loh avangin hmunhma nei tha Kohhran Pastor-te sawm a, an hmunhmate hman theih a nih leh nih loh chungchangte hriatchian tuma inrawnkhawmna neih a ni a. Kohhranin hmunhma tha leh changthlung tak, nikum Covid-19 haw runpui neihah pawh phal taka an hawh tawh thute leh Covid-19 vanga tawrhna nasa zawk thleng thulha hman theih tur Community Covid Care Centre din chungchangah pawh an hnena ngenna siam nise tih a nih thute he hunah hian tarlan a ni bawk.

He huna tel Champhai Town Area chhunga PCI Pastor-te chuan harsatna tawh mekah kohhranin puih theihna leh tangkaina a neihahte inthlahrunna tur a awm loh thu leh, 4C din chungchanga an hnena ngenna thlente Kohhran Committee in a tul anga bawhzuia ngaihtuahho phawt nise an ti.

He hunah hian Champhai District paltlanga raltlan haw thin chungchang pawh ngaihtuah nawn leh niin, hri laka him tlan nan leh ramri kaltlanga dan lova thil tih awm palh thei ven nan ruahmanna felfai tak siam nise tih a ni a. DC, SP leh YMA hotuten ruahmanna siam se tih a ni.

Meeting-ah hian Champhai SP Pu Lalrinpuia Varte, Addl. DC Pu Henry C.Lalrawnkima, Official dangte, Champhai Town Area chhunga PCI Pastor leh VLTF Chairman theuhte bakah Sub-Hqrs. YMA (SYMA) Champhai hotute an tel a ni.