No.717/2021-2022

Aizawl the 28th May, 2021 : Vawiin khan Man Power Development Board Vice Chairman leh Aizawl West-I Bialtu MLA ni bawk, Pu Zothantluanga chuan a bial chhung AMC Area pawna khaw pathum - Dinthar Sairang, Sihhmui leh Sairang - khawtlang mipuite tan Sairang Jt. VC hnenah Ambulance a hlan.

Ambulance hlanna hun hi Sairang Police Station tualah hman niin, Aizawl West-I Bialtu MLA chuan Sairang Jt. VC khawtlang mipui zawng zawng ten tangkai taka an hman atan hlan a nih thu a sawi a. A bial chhungah rau rau, damloh leh chhiat tawhna dangah, veng dang zawng zawng te aiin Sairang tan chuan Aizawl pan chu thil harsa a nih thin avanga Sairang khua chu ngaihpawimawh hmasak an nih thu a sawi bawk. Pu Zothantluanga chuan Kohhran leh Political Party inthliarna awm hauh lova a mamawh apiangten tangkai takin hmang se, a theih chin chinah mi rethei leh pachhe zawk ten hlawkpui leh zual se a duh thu a sawi a ni.

He hun kaihruaitu Sairang Jt. VC Chairman Pu VL Chhanhima pawhin Sairang Jt. VC khawtlang aiawhin lawmthu sawiin, an khawtlang tana an lo awh ve thin em em Ambulance an mamawhna hriaa an Bialtu MLA-in a lei sak ta chu a lawmawm takzet a ni a ti. Hetianga an khawtlang harsatna tawh thinte hriatpui a, Bial chhunga khaw hla ber an ni chunga an khawtlang mamawhte tih hlawhtlin sak a, ngaihsaka tlawh reng thintu MLA an nei chu vannei an intihzia leh an lawmzia thu a sawi. Ambulance chu MLA-in a lei sak chhan ang ngeia, Sairang Jt. VC huamchhunga khaw pathum mipuiten tangkai taka an hman ngei dawn thu a sawi bawk a ni.

Pu Zothantluanga hian Sairang Jt. VC hnen a Ambulance a hlan rual hian Ambulance Driver hak tur PPE Set 7 leh Oxygen Concentrator a hlan nghal bawk a ni.