Vawiin khan Champhai DC Pu Zoengsanga kaihhruaiin Champhai District chhunga BRTF kawng siam dinhmun leh hmalaknate sawihona Champhai DC Conference Hall-ah neih a ni a. He hunah hian BRTF atangin Pu Attar Singh, AEE (Civil), 74 RCC bakah PHE, PWD leh P&E Department-a office hotute leh khawtlang hruaitu VCP leh VC member-te an kalkhawm a ni.

Pu Zoengsanga chuan kawng dinhmun in khawtlang nun leh sorkar hnathawh leh inuapna chenin ngawng a neih thin thu sawiin, thahnemngai taka kawng siam dinhmunte enzui a sawiho zel chu a pawimawh thu a sawi a. Department hrang hrangte chu hna inti thuanawplo zawnga hma la thin turin a chah bawk a. Kawng siam dawnin department dangte hmalakna a khawih tel dawn a nih chuan inrawn hmasa in, harsatna awm thei tur pawh awlsam takin a pumpelh theih a ni, a ti a. District pum hmasawnna tur a nih chuan thawhhona tha a ngai a ni, Pu Zoengsanga chuan a ti a ni.

Vawiin review meeting-ah hian Champhai Kanan veng leimin laia an hmalakna tur leh zirchiannate BRTF chuan report siamin, March ni 31, 2015 ral hmaa hna thawh tan an tum thu an tarlang a. Zotlang kawn atanga 74 RCC Camp panna kawng siamthat chungchang te, Khankawn kawng siam mek leh Khawzawl khawchhunga leitlahniam siamthat chungchang leh, daihrei zawk tura hmalak dan tur te sawiho a ni a. Chak zawka hmalak zel BRTF lam chuan an tum thu an sawi bawk.