Thal khawro intan chho mekah kangmei laka inven theih nan vawiin khan Champhai District Fire Prevention Committee chu an Chairman, Champhai DC Pu Zoengsanga hovin Champhai I&PR Conference Hall-ah an thukhawm. Chairman chuan vanduaina leh khuarel chhiat avanga kangmei chhuak palh chu awm thin mahse fimkhur tawkloh vang leh hriatchian tawkloh avang kang mei chhuak a tam zia sawiin, hmalak kan la mawmawh hle a ni, a ti a ni.

Pu Zoengsanga chuan kangmei laka fimkhur turin awareness campaign-te huaihawt a ni tawh thin a. Chumi chung pawh chuan kangmei a la chhuak tho thin chuan ram kan hmangaih tawkloh zia a tilang a ni, a ti a. Khua lum sawt tawh lutuk te hian boruak tidaitu ram ngaw kan tih chereu zia a tilang a, tui hna a titlem tawh hle bawk a ni, a ti a. Kum thar lo awm turah chuan kangmiei laka fimkhur turin hma kan lak theuh a ngai a ni, a ti.

Vawiin meeting-ah hian kumin chhunga ram kan dan thlir letna neiin, kumthara hmalak zel dan tur relho a ni a. Ram tikanglo khua hnena lawmman dawng tur thlan chungchangah kum zawna tikanglo rei ber thlan chungchangte, tlawmngai pawl hrang hrangte nena awareness campaign kalpui leh thu pawimawh dang sawiho a ni.