Ni 9.10.2018 khan District Election Office Champhai buatsaihin kumin inthlan vuakveta sum hman dan leh chet vel dan endika viltutur ten DC Conference Hall-ah Training an nei. Training hi Flying Squad member a ruatte leh Static Surveillance Teams te puala buatsaih niin Champhai District chhunga Assembly Constituency 5 atangin member-te an kalkhawm a ni.

Assembly Constituency bial tinah Flying Squad pahnih leh Static Surveillance Squad pahnih zel an awm dawn a. Flying Squad leh Static Surveillance Team tinah hian Magistrate 1 , Videographer 1 leh Police 3 zel an awm dawn a, an ni hian sum hman leh chet vel dan vilin dan in a phal loh anga ti an awm emaw report an dawng anih chuan finfiahna mumal tak telin Election thuneitute hnenah ziakin an thlen zel anga, a tul anga hremna lek kawh a ni dawn a ni.

Training hawnnaah Pu K.Vanlalthiana, Additional District Election Officer chuan Champhai District-ah inthlanna felfai leh dik tak neih anih theihna turin kalkhawmte chu thawhpuiah a sawm a. Training tha tak dawnga hmang tangkai tum theuh turin a chah a ni. Training-ah hian Resource Person hrang hrang; Pi Ethel Rothangpuii, Nodal Officer (EMC), Pu Lalbiakkila, Addl SP, Pu Lalremruata Kullai, Election Officer-ten zirtirna an pe a ni.