MLA Inthlanpui 2018 lo awm tura Lunglei District chhunga constituency pasariha Flying Squad (FS) leh Video Surveillance Team-te tan Ni 8 & 9.10.2018 khan training buatsaih a ni. He hunah hian Lunglei DC Dr Ankita Chakravarty, SP Pu C. Lalthanmawia leh election kaihhnawih official dangte an tel.

District Election Officer Dr Ankita Charavarty hova neih niin inthlan felfai leh muanawm tak a awm theih nan mawhphurhna nei zawng zawngte tha taka thawh ho a tul a ni, a ti a. Election Commission of India (ECI) duhdan te tha taka zawm a nih theih nana tih tur leh tih loh tur hrang hrang training tura kalkhawmte chu a sawipui bawk.

He hunah hian Election Officer Pu James Lalnithanga chuan Flying Squad member-te chu an tih tur leh hna thawh dan tur te an hrilhfiah a. An hna thawh nana an thil mamawh tur hrang hrang pawh sawiho a ni a. Flying Squad (FS) leh Video Surveillance Team a videographers te tan vawiin khan I&PR Conference Hall-ah Lunglei DIPRO Pi C.Lalremruati’n training a neih pui bawk.

Flying Squad hi inthlannaa suma intham leh inlei te, zu emaw, vote lei theihna tur thil dang emaw sem a awm loh nana hma latu tur an ni a. Chuti ang kaihhnawih report an dawn chu an bawh zui zel dawn a ni. Hemi bakah hian Campaign nana sum senna (sum hmanna) record kimchang tak buatsaihtu Video Surveillance Team (VST) din a ni bawk a. VST te hian a Campaign/ public meeting/ etc te an record thin dawn a ni. Lunglei District Assembly Constituency pasarih tinah Flying Squad Team pakhat leh Video Surveillance Team pakhat theuh din a ni.