No.6952/2020-2021

Vawiin chawhma khan Champhai DC Conference Hall-ah kuthnathawktu hlawhlingte leh fai inelnaa  district tihmingthatu  District Hospital Champhai  chawimawina hun buatsaih a ni. He hun hi Member of Parliament, Lok Sabha Pu C.Lalrosanga chuan a hmanpuia, Bamboo Link Road Board  Vice Chairman Pu Ramthanmawia, MLA,  25-East Tuipui A/C leh Health & Family Welfare Board Vice Chairman Dr. Z.R Thiamsanga MLA, 23-Champhai North A/C te pawh an tel a ni.

Vawiin kuthnathawktu chawimawina pekte hi an vaiin mi 7 an ni a, chawimawina thuziak leh pawisafai Rs 5,000/- theuh hlan an ni. He hun hi rinawm taka hna thawka hlawhtlinpui kuthnathawktute hnathawh tham ral lova hriatpuina hun leh mi dangte zirtirtu tangkai tak ni thei tur atana duan a ni.

Agriculture department hnuaiah buh thar tam mi 2 te chawimawi an ni a. Phai leilet bigha 36 a zau atanga buh tin 1627 thartu Pu K.C Doliana, Vangchhia leh tlangram loneih  tin 4 hmun atanga buh tin 738 thartu Pu Lalthanchhunga, Khuangthing  hnenah lawmpuina thuziak leh Rs 5,000/- Lok Sabha MP Pu C.Lalrosanga'n a hlan a.

Horticulture department hnuaiah  hectare 1 a zau, Bangalore Blue Variety Grape  puitling kung 1500 atanga Quintal 137 thartu  Pu HS Vanlalfakzuala, IB Veng Champhai,  Ryozeki Variety Zikhlum tin 1 hmun atanga Quintal 95 thartu Pu Lalchungnunga, Samthang leh Hmarchate tin 230 thartu Pu Immanuela, Thekpui hnenah lawmpuina thuziak leh pawisafai Rs 5,000/- Health & Family Welfare Board Vice Chairman Dr. Z.R Thiamsanga'n a hlan a.

AH&Vety department hnuaiah Vawk 43 vulhtu Pu R.Lalchhuanawma, Champhai Vengsang leh Sial 37 vulhtu Pu K.Vanhmingliana, Tualcheng te hnenah Bamboo Link Road Board Vice Chairman Pu Ramthanmawia'n chawimawina thuziak leh pawisafai Rs 5,000/- a hlan bawk.

Damdawiin fai inelna Kayakalp hmanga kum 2016 atanga 2020 chhunga Damdawiin fai thlanchhuah 3 zinga la tel zat zat District Hospital Champhai tana Clean, Beautiful and Healthy Champhai Town Committee te'n chawimawina thuziak an buatsaih chu Pu C.Lalrosanga'n District Medical Superintendent Dr. Zatluanga hnenah a hlan bawk a ni.