4015/2024-2025

Champhai, 30th January 2025: Vawiin khan Economics & Statistics Department buatsaihin Champhai District huamchhunga Registrar of Births & Deaths (RBD) zawng zawng te tan DRO Conference Hall, Keifangtlangah Civil Registration System chungchang training neih a ni.

He RBD Annual Training-ah hian District Education Officer Pi K.Lalsiamliani Chu khuallian niin Pu H.Lalhmangaiha, DRO chuan Training a kaihruai a. Directorate of Economics & Statistics atangin Pi B. Vanlalrengi, Deputy Director leh Pi Lalnunpuii Pachuau State Co-ordinator te chu Resource Person niin Training hi an pe a ni.

Khuallian District Education Officer Pi K.Lalsiamliani chuan he hunah hian Births & Deaths Registration pawimawh zia sawiin, “RBD a tan pawh sawrkarin mi rintlak, mi rinawm leh tlawmngaia a ngaih te chauh a ruat ṭhin,” a ti a. RBD kalkhawmte chu ram leh hnam innghahna an ni tih in hre reng turin a chah a, an hnathawhnaah theihtawp chhuah a, training hlawkthlak tak hmang turin a fuih bawk a ni. 

Mizoramah hian Births & Deaths Registration Unit 884 a awm a, heng zingah 116 te hi Damdawiin behchhan (Institution) niin, a dang zawng 768 te hi veng/khua pual (Local Unit) te an ni. Unit tinah hian Registrar of Births & Deaths (RBD), Sawrkar hnathawk mi pakhat zel an awm a ni.

Champhai District huam chhungah hian Damdawiin behchhan RBD 8 leh Veng/ Khua behchhan RBD 59 an awm mek a ni.

Births & Death Registration hi damdawiin behchhan  RBD 116 te hian nikum November 11, 2024 atang khan Online Registration kalpuiin – piang leh boralte hnenah Digitized Certificate zel an pe chhuak thei tawh a. February ni 1, 2025 aṭang hian veng/khua pual RBD 786 te pawhin Online Registration ti a, Digitized Certificate an pek chhuah theihna turin training hi buatsaih a ni.