No.2147/2021-2022

Aizawl, the 7th September, 2021: Champhai District Consultative Committee (DCC)/ District Level Review Committee (DLRC) chu vawiin khan Chairman Pi Maria C.T Zuali, Champhai DC hovin DC Conference Hall-ah an thukhawm. He hunah hian March 2021 quarter leh June 2021 quarter tawp thlenga Champhai District RD Block 2 huamchhunga Bank leh Stakeholder hrang hrangte hmalakna thlirho a ni.

He hun kaihruaitu Bawrhsap Pi Maria C.T Zuali chuan hripui leng vanga sum leh pai harsatna awm mek karah Bank pawimawhna a nasat zual thu leh, chak zawka hma an lak a tul thu a sawi a. Kuthnathawktu leh loneitute chawikang tura tanlak a tul thu sawiin, Bank lama thawktute chu kuthnathawktu leh loneitute tanpui tura inhawng deuh deuh turin a chah a. Sawrkar scheme pawimawh tak tak loneitute ten an chhawr tangkai theih tur angte chu dah pawimawh hmasa tur leh, hamthatna dawng thei turte hrilhhriat leh zirtir kawngah tan la thar turin a chah bawk a. Social Security Schemes, loan pek chhuah theih leh Bank kaltlanga hmathatna awm thinte zau zawka puanzar a nih theih nan Financial Literacy Campaign tam zawk nei theuh turin Bank hrang hrang thawktute chu a chah a ni.

Pu Jyoti Munna Soren, Lead District Manager (LDM), SBI Lead Bank Office Champhai chuan kalkhawmte lawmna thu a sawi hnuah quarter kalta chhunga Champhai District Bank hrang hrangte hnathawh leh hmalaknate thlirletna neih a nih bakah hmachhawpte sawiho nghal a ni.

Meeting-a tarlan a nih danin June 2021 quarter chhunga Champhai District-a Bank hrang hranga pawisa dahluh leh pekchhuah khaikhinna Credit Deposit (CD) Ratio chawhrual chu 43.14 % a ni a, March quarter tawpa CD Ratio 44.53 % aiin 1.39 % in a tlem a, hei hian CD Ratio bituk zat 60 % chu a phak lo a ni. 2021-2022 Financial Year chhunga Annual Credit Plan (ACP) hnuaia hnathawhte thlirho ni bawkin, Priority Sector atana target cheng nuai 13010.70 atangin cheng nuai 4269.93 (32.81 %) hu tihhlawhtlin a ni a, Non Priority Sector hnuaia target cheng nuai 1364 atangin cheng nuai 343.68 (25.19%) hu tihhlawhtlin a ni a. Pradhan Mantri Mudra Yojana (PMMY) hnuaiah mi 185 (Sishu-121, Kishore-57, Tarun-7) te hnenah loan cheng nuai 181.99 hu pekchhuah a ni tawh bawk.

June 2021 quarter tawp thleng khan Social Security Schemes Pradhan Mantri Jan Dhan Yojana (PMJDY) hnuaiah mi 23,299 inziaklutin, Pradhan Mantri Jeevan Jyoti Bima Yojana (PMJJBY) hnuaiah mi 9,139, Pradhan Mantri Suraksha Bima Yojana(PMSBY) hnuaiah mi 14,940 leh Atal Pension Yojana (APY) hnuaiah mi 474 te an inziaklut a. June quarter chhungin thingtlang/zokhaw mite tana Bank hman dan zirtirna Financial Literacy Campaign tum 2 buatsaih niin mi 24 an tel a ni.

Heng bakah hian Currency remittance leh Bank leh ATM venhim chungchang sawiho a nih bakah pawisa lakchhuah theiha a awm reng theihna tura tanlakna turte sawiho a ni a. Bank tinte pawh chak zawka hma la a, quarter tawp ni atanga chhiara ni 15 chhunga data thehlut thin tura hriattir nawn leh an ni bawk.

Tun dinhmunah hian Champhai District-ah Bank branch hrang hrang 17 awm mekin, Public Sector Bank 5, Private Sector Bank 5, Regional Rural Bank 6 leh State Cooperative Bank 1 te an awm mek a ni. ATM 9, Business Correspondent 8, CSP 1 leh IPPB hnuaia Banking Touch Point 26 te an awm mek a. Financial Literacy Centre 2 (Lead Bank Office, SBI Sponsored leh Champhai Financial Literacy Centre, MCAB Ltd.) te a awm mek bawk a ni.