No.4276/2021-2022
Aizawl the 15th March, 2022: Champhai District Consultative Committee (DCC)/ District Level Review Committee (DLRC) chu vawiin chawhma dar 11:00 khan an Chairman, District Bawrhsap Pu Henry C.Lalrawnkima hovin DC Conference Hall-ah an thukhawm. He hunah hian December 2021 quarter tawp thlenga Champhai District RD Block 2 huamchhunga Bank leh Stakeholder hrang hrangte hmalakna thlirho a ni.

He hun kaihruaitu Bawrhsap Pu Henry C.Lalrawnkima chuan Bank leh Line Department hrang hrang aiawh kalkhawmte chu hmachhawpte tha taka hlen a nih theih nana tanla turin a chah a. Bank hotute chu Bank chhawr tangkai dan leh hman kawnga fimkhur tulna hrang hrangte mizo tawng ngeia zau zawka mipui an zirtir tam deuh deuh a pawimawh thu hrilhin, Bank kaltlanga hamthatna awmte mitin huapzo leh banphak a nih theih nana theihtawp chhuah turin a sawm a. Loan pekchhuah kawngah tanlak a ngaih thu pawh tarlangin, anmahni pana dawrtute puih an ngaihna zawnah tlanchhe lova pui thin turin a chah bawk a ni.

Pu Jyoti Munna Soren, Lead District Manager (LDM), SBI Lead Bank Office Champhai chuan kalkhawmte lawmna thu a sawi hnuah quarter kalta chhunga Champhai District Bank leh Stakeholder hrang hrangte hnathawh leh hmalaknate thlirletna neih a nih bakah hmachhawpte sawiho nghal a ni.

Meeting-a tarlan a nih danin December 2021 quarter chhunga Champhai District-a Bank hrang hranga pawisa dahluh leh pekchhuah tam zawng inthlauhna khaikhinna Credit Deposit Ratio/CD Ratio chawhrual chu 59.67 % a ni a, September 2021 quarter tawpa CD Ratio 48.36 % atangin 11.31 % in a pung a, mahse hei hian CD Ratio bituk zat 60 % chu a phak lo hret a ni. Hemi hun chhung hian Bank-ah cheng nuai 52119.53 dahluh a nih laiin Bank-in pawisa a pekchhuah zat hi cheng nuai 31101.38 a ni. 2021-2022 Financial Year chhunga Annual Credit Plan (ACP) hnuaia hnathawhte thlirho ni bawkin, Priority Sector atana target cheng nuai 13010.70 atangin cheng nuai 13041.75 (100.04 %) hu tihhlawhtlin a ni a, Non Priority Sector hnuaia target cheng nuai 1364 atangin cheng nuai 3406.82 (249.76 %) hu tihhlawhtlin a ni. Pradhan Mantri Mudra Yojana (PMMY) kaltlangin Sishu hnuaiah mi 93, Kishore hnuaiah mi 219, Tarun hnuaiah mi 38, Stand up India hnuaiah mi 3, an vaiin mi 353 te hnenah loan cheng nuai 724.02 hu pek chhuah tawh a ni bawk.
Nikum December quarter tawp thlenga Social Security Scheme hnuaia inziaklut tawh zat chu Pradhan Mantri Jan Dhan Yojana (PMJDY) hnuaiah mi 22988, Pradhan Mantri Jeevan Jyoti Bima Yojana (PMJJBY) hnuaiah mi 10419, Pradhan Mantri Suraksha Bima Yojana (PMSBY) hnuaiah mi 16404 leh Atal Pension Yojana (APY) hnuaiah mi 639 an inziaklut tling tawh a. Hemi quarter chhung vek hian Priority Sector hnuaiah Non Performing Assets (NPA) cheng nuai 2504.47 (26.36 %) leh Non Priority Sector hnuaiah NPA cheng nuai 70.84 (57.58 %) awmin Bakijai case report a awm lo a, Bank hman dan leh fimkhur inzirtirna Financial Literacy Campaign (FLC) neih a ni lo a ni.

Heng bakah hian Bank leh ATM venhim chungchang sawiho niin Police lam atangin Security report ngaihthlak a ni a. Bank venhim kawnga tanlak ngai zualte chu a tul anga bawhzui tura hriattir an ni a. Currency Remittance chungchang pawh sawiho ni bawkin, Bank tinte chu quarter tawp ni atanga chhiara ni 15 chhunga data thehlut thin tura hriattir nawn leh an ni bawk.

December 2021 quarter tawp thleng khan Champhai District-ah Bank branch hrang hrang 17 a awm a, Public Sector Bank 5, Private Sector Bank 5, Regional Rural Bank 6 leh State Cooperative Bank 1 te bakah ATM 9, Business Correspondent 8, CSP 1 leh IPPB hnuaia Banking Touch Point 26 te a awm a ni. Financial Literacy Centre 2 (Lead Bank Office, SBI Sponsored leh Champhai Financial Literacy Centre, MCAB Ltd.) te awm bawkin, Champhaiah RSETI (Rural Self Employment Training Institution) hranpa a awm loh avangin RSETI Aizawlin a vil a ni.