No.4277/2021-2022
Aizawl 15.3.2022: Chief Minister Pu Zoramthanga chuan vawiin khan Mizoram Youth Commission Office-cum- Coaching Centre, MINECO chu a hawng.

Chief Minister Pu Zoramthanga chuan thalaite hmakhua tana tan lak theihna tura Mizoram Youth Commission din a nih thu sawiin, vawiinah office building tha tak hawn a ni thei chu lawmawm a ti a. Tangkai taka hman a nih a, thalai te tan hmasawn hna thawh zelna tura lungphum pawimawh tak lo ni se, a ti a ni. Chief Minister chuan thalaite chu an thatlai hmang tangkai in, talent an neihte a hunlaia hman nachang hre tura a duhsak thu a sawi a. Tun hma lamah chuan zirlai lehkhabu chhiar duhte pawh hmu zawh loh changte a awm thin thu sawiin, tunlai information khawvela technology hmasawnna zarah awlsam taka thil hriat duh hrang hrangte mobile phone leh computer kaltlanga zawn hmuh zung zung theihna khawvela kan cheng hi thalaite vanneihna a nih thu a sawi.

Chief Minister chuan thenkhat tan chuan harsatna avanga inhlawh paha lehkhazir a ngaih chang a awm theih thu leh, amah ngei pawhin chu chu a paltlang tawh thu a sawi a. Tuna MYC in all India service a Mizo thalai tam thei ang ber an luh theihna tura buatsaih a, zirlai thalai te tan awlsamna a rawn siam sak chu lawmawm tiin, tangkai taka hman a nih a beisei thu a sawi a. Hnam dangin an theih hi kan theih ve loh na chhan tur a awmlo a ni a ti.

LESDE leh School Education changtu Minister Pu Lalchhandama Ralte chuan MYC din chhoh a nih dan thu a sawi a. Thalaite hmakhua ngaihven lama thahnemngaihna avanga zirlai pawl hrang hrang ten sawrkara an thlen dan te, political party hrang hrangte pawhin tha an tihpui dan te sawiin, kum 2006 atanga youth commission siam tura drafting committee sawrkarin a siam tak thu te a sawi a. Din a nihna la reilo hle mahse MYC chu a thang duang hle a ni tiin Minister chuan thalaite hmakhua ngaihpawimawhna zar nia a hriat thu a sawi. Pu Lalchhandama Ralte chuan sawrkarin thalaite tichak a, "empower" tuma a ngaihpawimawh duhsakna phu a Zoram mamawh chhanna ni mh ngei tumin, tuna central leh all india service ah luh a ni emaw, entrepreneurship lam te, mahni ke a ding a intodelh ngei tur ten ram leh hnam tan theihtawp chhuah ve turin leh sawrkar tawiawm zel turin thalaite sawm a ni.

Mizoram Youth Commission Chairman Dr. Vanlaltanpuia chuan vawiina office building thar hawn tak chu thalaite hmun, thalaite ta a ni tiin tlangnel taka he hmun hi hmang tangkai turin a sawm a. Budget session neih zawh takah All India Service a thalai tam zawk a luh theihna tura thalaite buatsaihna tura budget session neih zawh tak chiah a cheng vbc 2.66 chu office inrelbawlna tur pangngai bakah dah a ni chu lawmawm a tih thu a sawi. MYC Chairman chuan competitive exam lam, a bik takin All India Service chuan thalaite ngaihsak leh phurna lam a ni ta lo hle nia a lan avangin nasa taka hmalak a nih zel tur thu a sawi a. Lehkha thiamna mai bakah sumdawnna lam te, mahni themthiamna hmanga eizawnna tur buatsaih sak te a pawimawh thu a sawi a. Hemi kawngah pawh hian hma lak a nih dan leh, covid hrilen tirh lamah reverse migrant worker te bul an tan that lehna tur atan hmalak a nih dan te a sawi bawk.

Vawiin MYC building thar hawnna inkhawmah hian Tuirial bialtu MLA, Pu K. Laldawngliana, AMC Mayor , Pu Lalrinenga Sailo te leh MYC Chairman hlui Pu Joseph Lalhimpuia te an tel a, MYC in a thawhpui ALS Coaching Centre, Delhi atanga aiawh Pu Prateek Bhattacharya a tel bawk.

Pu H. Lalnunzuala, Under Secretary, MYC chuan report a pe a, LESDE Secretary Pu Lalramsanga chuan lawmthu sawiin hun a khar a ni.

Vawiina office building thar hawn tak hi project hming ah 'Construction of Mizoram Youth Commission Office -cum-Coaching Centre' vuah a ni a. Project cost hi Rs. 3,00,00,000 niin Lushai Engineers, Ramhlun, Aizawl chu contrating agency an ni. Kum 2020 October thla khan a sak hna hi thawh tan a ni a, September 2021 khan zawh a ni. A vaiin chhawng li (4) awmin, Chairman, Secretary, leh thawktu dangte thutna tur bakah Coaching Room pathum, computer room te, Conference Hall, Cafeteria leh Chowkidar quarter te a awm a ni.