No.4278/2021-2022
Aizawl the 15th March, 2022: Vawiin khan School Education Minister Pu Lalchhandama Ralte hovin a office chamber-ah School Session thara school hawn dan tur chungchang ngaihtuahin school Education Department Officer leh zirtirtu inzawmkhawm pawl hruaitute an thukhawm a. School Education Minister Pu Lalchhandama Ralte-in School Session thar sikul luh hun tur chu April 5, 2022 anih thu a sawi.

Meeting-ah hian Minister Pu Lalchhandama Ralte chuan hrileng avangin Zirna in a pangngaia hawn theih a ni lova, hei hi zirlai Naupangin an tuar em em tawh a, tunah hian India ram hmun hrang hrangah zirna a pangngaia kalpui a lo nih leh takah chuan Sorkar rawn chung leh SOP te zir chiangin Ni 5, April, 2022 hian Mizoramah zirna in zawng zawng chu hawn a ni dawn a ti. Hemi atana Department lamten an tih tur awm zawng zawngte pawh an peih fel tawh thu a sawi bawk.

Vawiin meeting-ah hian Private sikul ten fee a pangngaia 100% a an lâk chu phalsak an ni a. Sikul luh leh huna kaihhruaina SOP tur chu Director School Education lamin an sem darh nghâl ang.

Pre School - Balvaatika leh Vidhya Parvesh tih hming chu a ram mila hming phuah rawt a ni bawk. Mizoram School Standard Authority leh School Quality Assessment Framework pawh ngaihtuah zui a ni a, tihlawhtling tûra bawhzui zêl rem tih a ni. Covid vanga Board Exam thu tluan thei lote tan ruahmanna siam tum a nih thu pawh rel a ni.

He meeting a tel Association lam hruaitute pawhin zirna a pangngaia hawn chhunzawm leh tur chu phurawm an tih thu leh nu leh pa lam pawh an phur tawh thu an sawi bawk.