No.4279/2021-2022
Aizawl Vau thla ni 15, 2022: Vawiin khan Lawngtlai DC Conference Hall-ah World Consumer Rights Day, 2022 pualin hun hman a ni a. Lawngtlai Bawrhsap charge la mektu Pi Marilyn Rualzakhumthangi chu khuallian a ni.

Pi Marilyn Rualzakhumthangi chuan consumer-te'n dikna chanvo an neih chu danin tha taka a humhalhsak thu sawiin, consumer-te'n chhawr tangkai nachang hriat a pawimawh tih a sawi a. Tunlaia internet hmanga inbumna tam em em mai chu sumdawng leh mipui mamawh petu (service provider)-te'n consumer-te hriat tur chin an hriattir that tawk loh vang a ni em tih te pawh ngaihtuah theih tak nia a hriat thu sawiin, sumdawng leh mipui mamawh petute chu anmahni dawrtute'n an chanvo dik tak an chan theih nana rinawm taka mipui rawngbawl turin a chah a ni.

He hun hi Lawngtlai District Civil Supplies Officer Pu Lalrinsanga'n a kaihruai a. Kumin World Consumer Rights Day thupui, "Fair Digital Finance" tih hmangin Mizoram Rural Bank, Lawngtlai Branch-a Chief Manager Pu Joseph Lalremruata chuan tunlai thiamna hmanga khawlthluaknei chi hrang hrang leh internet kal tlanga sum khawih chet vel chungchang leh dik leh felfai taka hman a nih theih dan tur chungchang a sawi a. Consumer Association leh Consumer Forum ai awhte hnen atanga thu sawi ngaihthlak ni bawkin, Lawngtlai DCSO office-in World Consumer Rights Day, 2022 puala consumer-te zirtirna video clip an buatsaih chu thlir ho nghal a ni bawk.

He hunah hian Lawngtlaia sawrkar official-te, consumer forum, consumer association, sumdawng pawl, tlawmngai pawl leh kohhran ai awhte an kal khawm a ni.

Khawvel huapa consumer-te dikna humhalh tura hma latu inzawm khawm pawl, Consumers International bul tumin kum 1983 atang khan March ni 15 hi World Consumer Rights Day atan hman tan a ni a. Kum 1962 March ni 15-a khatih laia US President John F. Kennedy-a'n US Congress-a "consumer-te dikna chanvo humhalh chungchang" a sawi atanga consumer-te chanvo humhalh tura hma lakna lo lian chho zel a nih avangin he ni hi World Consumer Rights Day atana rawt leh hman a ni.