3352/2023-2024

Champhai the 16th January, 2024 – Cheng nuai 4915.35 senga ruahman tur District Court Complex, Vengsang Champhai chu nimin tlai khan Justice Michael Zothankhuma, Justice Nelson Sailo leh Justice Marli Vankung ten a lungphum an phum a ni.

District Court Complex, Vengsang Champhai lungphum phumna ah hian Champhai DC Pu James Lalrinchhana leh Head of Office dangte, Champhai District Court a thawktute, media mi te, tlawmngai pawl hrang hrang hruaitute leh khawtlang hruaitute an tel tha hle a ni.

Justice Michael Zothankhuma, Judge, Gauhati High Court chuan November 2021 a Champhai Judicial District din anih hnuah hmalakna hrang hrang leh hmasawnna tam tak awm chho zelin District Court Complex changtlung tak ruahman tur ani ta chu lawmawm a tih thu a sawi a. District Court Complex, Vengsang chu tha taka ruahman anih ngei theihnan a sak hna chu High Court in uluk taka a vil tur thu leh, khawtlang mipuite, NGO-te leh media mi te pawhin neitu rilru thinlung pu a, uluk taka lo vil pui thin turin a chah a. Mizorama dan bawhchhiatna hrang hrang awm mek dinhmunte pawh tarlangin Mizorama case 6113 awm mekah a zahve vel (3032) chu Dan bawhchhiatna lian tham Criminal Case an nih thu a tarlang a. Champhai District a case awm mek chu 482 niin, hengte zinga case 367 (76.14%) te chu Criminal Case an tih thu a sawi a. Champhai District ah Criminal case a pung chak em em chu veiawm a tih thu sawiin, Sawrkar official-te, Dan leh thupek kengkawhtute, tlawmngai pawlte leh mipuite chu Dan bawhchhiatna do kawngah theihtawp chhuah tlan a tul takzet a ni, tiin hmalak puiah a sawm a ni.

Justice Nelson Sailo, Judge Gauhati High Court chuan District Court Complex ruahman na tur hmun tha tak neih theih a ni chu lawmawm tiin, Champhai District mipuiten dikna chanvo an ngaih pawimawh zia a ti lang chiang hle a ni, a ti a. District Court chu mipuite dikna chanvo humhimna hmunpui anih angina mipui zawng zawngte ta a ni a, a hmunhma pawh tha thei ang bera ruahman anih ngei theihnan neitu rilru pu a lo vilpui turin Champhai District mipuite a sawm a ni.

Justice Marli Vankung, Judge Gauhati High Court & Portfolio Judge for Champhai Judicial District chuan Champhai District-ah hmasawnna tam tak hmuh tur a awm rualin Dan bawhchhiatna case pawh tam tak a awm thu a sawi a. Dan bawhchhiatna do tur leh a bawhchhetute Dan ang ngeia hrem an nih theihna turin hriatpuitu (witness) an pawimawh takzet thu sawiin, mipuite chu Justice system a an pawimawhna hre thar theuh turin a chah a ni.

District Court Complex, Vengsang Champhai lungphum phumna ah hian Champhai DC Pu James Lalrinchhana pawhin thu sawiin, Pu Liansangzuala, District & Sessions Judge, Champhai Judicial District chuan kalkhawmte lawmna thu a sawi a. Pu Thang Lianmanga Guite, Registrar, Gauhati High Court, Aizawl Branch chuan lawmthu sawina hun a hmang a ni.

Er Lalremruata, Sr EE, PWD Project Division III chuan Technical Report a pe a. District Court Complex, Vengsang Champhai sakna tur hian administrative approval cheng nuai 4915.35 hmuh niin, kum 2023-24 atana expenditure sanction hi cheng nuai 241.50 a ni a. Contractor te hi Beriwal Construction, Guwahati an ni a, hna hi 05.10.2023 ah bultan niin, 17.10.2026 ah zawhfel tum a ni.

District Court Complex Building ah hian Basement I,II,III, Ground Floor leh First Floor te awm tur niin, a zau zawng hi 11,201.50 square meters a ni dawn a ni.