3353/2023-2024

Champhai the 16th January, 2024 – Nizan khan Tuipuiral Annual Sports Meet vawi 51-na chu East Tuipui bialtu MLA Pu Ramthanmawia’n a Kick Off a ni.

Thusawiin khuallian Pu Ramthanmawia chuan Mihring ten kan mamawh ber pakhat chu hriselna tha neih hi a ni tiin, hriselna tha nei lo chuan engmah a nih theih loh. Hriselna tha nei tur chuan ruihhlo laka fihlima, infiamna leh taksa sawizawi uar a tul a ni tiin, thalaite chu ruihhlo laka fihlim tlat turin a chah a. Tuipuiral Annual Sports Meet chu thalaite rilru leh taksa hriselna kawngah te leh khawtlang mipuite inlungrualna kawngah te nghawng tha tak a neih ngei a beisei thu sawiin kalkhawmte chu hun hlimawm leh hlawkthlak tak hmang theuh turin duhsakna a hlan a ni.

Tuipuiral Annual Sports Meet Kick Off Programme Sesih Community Hall a neih hi BS Thanga & Liankimi Sesih ten an kaihruai a, Secretary Samuel Lalrinsanga hnen atangin Introduction leh Report ngaihthlak a ni. Upa Nangkhanngova’n hunserh a hmang a, TGSA President Lalthanzama Tlau bak ah, TGYMA, Block MHIP leh TZP aiawh ten thu an sawi bawk. Member boral te sunna leh Sports lama member mi hmingthate chawimawina hun hman a ni bawk. Special Item hrang hrang nen hun hlimawm tak hman a ni.

Tuipuiral Annual Sports Meet vawi 51 na hi January ni 15-27, 2024 chhung hian Sesih ah neih tura ruahman a ni a. Football mipa team 15 telin Match 32 a awm ang a. Volleyball mipa team 15 awmin match 26 a awm ang a, Hmeichia Volleyball team 6 telin, Match 35 a awm ang. January ni 27 hian Football leh Volleyball Final te hi khel a ni ang.

Nimin vek khan Pu Ramthanmawia chuan MLA fund Rs 200,000/-seng a sak Sesih Student Union Office a hawng bawk. Thusawiin Pu Ramthanmawia chuan Sesih Students Union ten sum tlemte hmanga Office tha tak an sa thei chu lawmawm a tih thu leh an thahnemngaihna leh thawhrimna fakawm a tih thu a sawi a. Zirna hi hmasawnna bulpui a ni a, zirna tel lo chuan hmasawnna tluantling a awm thei lo, Zirna kawngah i thangharh deuh deuh ang u a ti a. Harsatna vanga zirna chhunzawm thei lo thiam thei si lehkha zir chak bawk si. Technical lamah te leh MBBS emaw zir duh in awm chuan theih tawp chhuaha puih che u ka inhuam reng ani a ti bawk.

Tukin zingkar khan Pu Ramthanmawia chuan BADP sum 24 lakh senga siam Sesih Playground leh Pavillion te a hawng bawk.

Pu Ramthanmawia chuan hun rei tak hnuah Sesih khua in field puitling an nei thei ta leh Tuipuiral Annual Sports Meet hial an dawng thei ta chu a lawmpui thu sawiin. He field hian in fiammi hlawhtling tam tak hring chhuak se a duhthu a sawi bawk.

Pu Ramthanmawia hian vawiin lamah bial fan thawh hnihna nei  chhunzawm nghal in vawiin lamah Lianpui , Leisenzo, Sazep, Vangchhia, Leithum leh Dungtlang te a tlawh a. A bial fan hi tun thla ni  20 thleng a chhunzawm ang.