Vawiin chawhma khan Champhai District huamchhunga Police Officer-te chuan Crime Review Meeting, SP Office Chamber-ah an nei. Kum 2015 leh 2016 January atanga April thla chhunga pawikhawihna dinhmun thlira sawi ho a ni.

He Meeting hi Champhai SP charge la mektu Pu VL Lura Hauzel, Addl. Sp chuan kaihruaiin, Champhai Police te hmasawnna tam tak hmuhtur awm chu thil lawmawm tak ani a ti a, District chhung mipuite an him leh thlamuang taka an awm thei nan leh thil tisualtu man chhuaha hrem an nih thei nan tan la lehzual turin Police Officer kalkhawmte chu a chah bawk. He meeting-ah hian Case I/O bakah SDPO Champhai Pu Lalringliana Pachuau leh Khawzawl SDPO Pu Bulliana te pawh an tel thei a.

Champhai District-ah Kum 2015 January atanga April thla inkarah case 66 ziahluh anih laiin Kum 2016 January atanga April thla chhungin case 93 zet ziahluh a ni thung a. Case ziahluh hi 27 in a pung a. Kum 2016 chhunga case ziahluh tam zawk chhan nia lang chu chhungkaw buaina non-FIR a ziahluh thin chu regular case-ah ziahluh anih tawh vang te, Drug Case bakah a hlutna tlem te te nia lang pawh case ziahluh zel tawh avangte nia tarlan a ni a.

Champhai District chhunga dan leh thupek dinhmun a that zel theih nan nasa taka hmalak mek zel niin Traffic Compounding-ah target insiamin lirthei dan bawhchhia te chu manin an phu tawk hremna pek thin an ni a. Nikum 2015 January atanga April thla chhunga Traffic Compounding ah Rs 15,800 hmuh anih laiin Kum 2016 ah erawh chuan Rs 1,06,500 hmuh ani a. Traffic Compounding-ah pawh nasa taka hmasawnna hmuh niin hlawhtlinna ropui tak anih thu tarlan a nih bakah lirthei khalhtu signal hmang dik lo leh pe dik lo te chu hrem an nih tur thu tarlan ani bawk.

Heng bakah hian Champha District chhunga dan lova sapel a tlem zawk theih nan nasa taka hmalak niin Wildlife Control Squad din a ni a, kartin a inchhawkin duty an nei thin a. Dan kalha Sapel te hi Arms Act bawhchhiatna anih avangin mipuite dan ngaipawimawh tura ngenin Kum 2016 June thla atang chuan dan kalha sapel te chu case siamsak zel an nih tur thu an sawi bawk.

Rukruk chungchangah mi tam takin mi thil ruksa tih hriat chian ngawih ngawih lo leisak an awm thin avangin rukruk a pun nasat thu tarlan niin mi thil ruksa lo leisak lo turin ngenna siamin mi thil ruksa lo leisak hi dan bawhchhiatna anih avangin IPC Section 411 hmanga hrem theih an nih thu tarlan a ni bawk.

Champhai Police-te chuan District chhunga mipuite hlim tak leh thlamuang taka an awm theih nan dan leh thupek ngaipawimawh theuh turin an ngen a. Khawtlang nun tichhe thei leh tibawrhbang thei zawng a che misualte man thuai an nih theih nan khua leh tui an nih ang leh danin a phut anga an thil hriatte Police hnena hriattir thuai turin mipuite an ngen bawk.