Vawiin chawhnu dar 2:30 khan Environment & Forest Minister Pu Lalrinmawia Ralte kaihhruaiin Sub-Level Committee on Green Mizoram member-te chuan a pisaah Green Mizoram Day 2016 hman dan tur an rel.

Meeting-ah hian kum danga Green Mizoram Day lo hman thin dan thlirletna neih a ni a. Kumin Green Mizoram Day lawmna pui ber chu June ni 11 hian Thenzawla neih tura ruahman niin khuallian atan Chief Minister hman tum a ni bawk. Meeting chuan thing tiak awm remchang apiang phun mai lova a hmun azir zela a chi (species) thlan bik neih tha a ti a. Kum danga thing phun tawhte chu sawrkar leh tlawmngai pawl tangkawpten uluk zawka humhalh leh enkawl zel ni se a ti a. Kangmei chhuak ven kawnga village leh district level-a titha zualte chu State leh District Level Committee-ten an huam chhung theuha lawmman sem leh turin a beisei bawk. Mimal, pawl leh zirnain, thing humhalh kawnga hma la thate chu chawimawi nise a tiin a rel bawk.

He Sub-Committee ah hian sawrkar department hrang hrang leh tlawmngai pawl aiawhte an tel a. He Committee-in rawtna a siamte hi Chief Minister kaihhruai State Level Committee hmaa la chhawp leh a ni ang a, kumin atana thupui pawh thlan fel nghal tum a ni.