Nimin tlai dar 6:30 khan Aijal Club Conference Hall-ah Chief Minister Pu Lal Thanhawla chuan Mizoram State Legal Services Association (SLSA)-in naupangte dikna chanvo humhalh kawnga inzirtirna tura documentary film a buatsaih 'Documentary Film on Child Rights' chu a tlangzarh a. He hunah hian Gauhati High Court judge pahnih, Justice Ujjal Bhuyan leh Justice Michael Zothankuma bakah dan hremi thahnem tak an tel a ni.

Documentary film tlangzarh paha thu sawiin Chief Minister Pu Lal Thanhawla chuan naupangte dikna chanvo humhalh chungchanga India leh ram thang mek zawng zawngteN harsatna an tawh thin chhan pakhat chu hemi kawnga inhrilhhriatna (awareness) kan neih tlem vang a ni, a tiin, Mizoram SLSA-ten hemi atana Documentary Film changtlung tak an siam chuan Mizote zingah naupangte dikna chanvo humhalh kawnga rah tha tak a chhuah ngei a beisei thu a sawi a. Chief Minister chuan khawvel changkang zel mil in Mizoramah pawh naupangte dikna chanvo humhalhna dan siam that zel a nih bakah nu leh paten fate pawimawhna kan hre thar zel hian naupangte tan hun tha a her chhuahpui mek a ni, a ti bawk. Mizoramah hian naupang khuaikhem hi ramchhung hmundang aiin tlemin lang mahse thenawm khawveng hmaizah avanga puangchhuak lo harsatna tawk tam tak an awm tih hria a nasa zawka tanla turin khuallian chuan danhremi kalkhawmte sawm a. Naupangte hi nakin lawka chhungkaw khaidingtu tur, ram leh hnam nghahfak an nih avangin pi leh pute atanga Mizoten kan chin, tihluihna tel lova naupangten hma an sawn theihna tura hnathawh dan zirtir leh kaihhruai erawh a tha em em a, chin zui zel that thu Khuallian chuan uar takin a sawi bawk. Chief Minister chuan school dropout pung zel pawh ngaihmawhawm khawp a nih tawh thu leh naupangte dikna chanvo humhalh kawngah nasa zawka hmala turin kohhrante chu a ngen bawk.

He Documentary Film tlangzarh inkhawmah hian Gauhati High Court Judge leh Mizoram SLSA Executive Chairman ni bawk Justice Ujjal Bhuyan pawhin State Legal Services Authority hmalakna hrang hrangte leh India Constitution leh dan hrang hrangten naupangte dikna chanvo a humhalh dan a tarlang a. Naupang tihduhdah tuar emaw harsatna tawk an awm chuan thuneitute hnena hriattir hi mitin mawhphurhna a ni thu a sawilang bawk.

Gauhati High Court Judge Justice Michael Zothankhuma pawhin hmeichhe naupangten khawvel hmuntinah, an pian hma atangin thliarhranna an tawk nasa em em a. Hei hi India ram Constituition Article 16-na in a khap tlat a ni a ti bawk.