Vawiin khan DC’s Conference Hall, Keifangtlang, Champhaiah District chhunga Central sawrkar sum hmanga hmasawnna hnathawh hrang hrangte enzuitu Committee; District Development Co-ordination & Monitoring Committee (DDCMC/DISHA) chu an Chairman Pu Ronald Sapa Tlau, M.P Rajya Sabha hovin an thukhawm a. Meeting-ah hian Champhai District chhunga MLA; Pu JH Rothuama, Pu Lalrinliana Sailo, Pu TT Zothansanga leh Pu T. Sangkunga te pawh an tel a ni.

Chairman chuan Champhai District chhunga sawrkar hnathawkte  chu District tan hian engnge ka tih ve theih ang tih rilru pu chunga taima leh rinawm taka thawk turin a chah a. Mumal leh chak zawka hnathawh anih theih nan MLA te nena inrawn tawn  a pawimawh thu a sawi a. Rundal mai nilova  District dinchhuahna atana theihtawp chhuaha  hna thawk turin sawrkar official-te chu a fuih a; sawrkar scheme hlawhtlinna chu an kutah thui tak a innghah thu a sawi.

Meeting hi Pi Zosangzuali Pachuau, Project Director, DRDA chuan kaihhruaiin Department hrang hrangten meeting hmasa thurel bawhzui  dan report an pe a. Report hrang hrangte chu a tul angin sawi zuia hmalak chhunzawm dan tur ruahman nghal zel a ni.

Rural Development hmalakna MGNREGA hnuaiah 2017-18 , February thla thlengin ni 47 inhlawhna siam tawh niin, Champhai District-ah Job Card  28,322 a awm mek thu tarlan a ni a. PMAY-G (Rural Housing Scheme)  hnuaiah beneficiary mi 150 te hnenah insak tanpuina pek niin IWMP Project paruk   kalpui mek a ni. MGNREGA hnuaiah hian Champhai leh a chhehvelah DRDA Champhai, Institute of Bioresource Technology (IHBT), Palampur, Himachal Pradesh leh Horticulture Department-te nena thawkhoin Apple Plantation Programme enchhinna neih mek niin beiseina sang tak neih a ni a. Chin hmaska lamte chu kumin hian a rah hman beisei a ni.

Swachh Bharat Mission (Urban) hnuaiah hnawmbawm sem, Fai inzirtirna Campaign leh ODF re-certification Champhai, Khawzawl, Khawhai leh Biate-ah te neih niin ODF-a recertified an ni. Mizoram khawpui fai inelnaah Biate chu a pumpuia Mizorama khaw fai ber a thlan a ni a, Champhai pawh District khawpui bik inelna category-ah pathumna a ni bawk a ni. Meeting-ah hian Champhai khawpui chhunga tui chhe paih  fimkhur a tul thu leh mipuite tui tlan lai ti bawlhhlawh zawnga  a luang a nih chuan hriselna atan a pawi dawn thu tarlan a ni a. Heng bakah hian buh leh thlai china atana chemical fertilizers hman fimkhur loh avanga chhiatna thleng theite pawh sawiho niin Crop rotation leh organic leitha hmanga lei tih that dan enfiaha zirchian nise tih a ni bawk.

Swachh Bharat Mission (Rural) hmalaknain thingtlang khaw 10-ah Solid Waste Management (SWM) hmun siam ni tawhin, Community Sanitary Complex (CSC) pawh 3 siam zawh a ni tawh bawk a ni. Khuangthing WSS leh Bungzung WSS-te zawh ni tawhin heng bakah hian Water Supply Scheme (WSS) dangte pawh thawh chhunzawm zel a ni a, Keilungliah Recreation Dam pawh thawh thuai tura hmalak mek a ni bawk.

NHM hnuaiah October-December, 2017 chhung khan Naupiang dam tha 408 awmin IMR chu 14.71. Nu nau chunga thi 1 a awm bawk a ni. A nawlpuia thisen test mi 814 zinga 26-te chu HIV positive an ni a, Nu naupai thisen test mi 589 zinga 4-te pawh HIV positive an ni tih hmuhchhuah a ni bawk. Mipa zingah kum 25-34 inkar kaithar tam berin Hmeichhia lamah kum 35-49 inkar an tam ber ve thung a ni. TB test mi 118 zinga 3 te chuan TB an vei a, 1 chuan Multi-Drug Resistance TB a vei tih finfiah a ni bawk. Damlo khawsik thisen test 3,592 zinga 1 chuan Malaria PF a vei a, Malaria vanga thi an awm lo thung.

National Social Assistance Programme (NSAP) hnuaiah tar chawmna/ Tar pension mi 2,782; Hmeithai pension mi 269 leh Disabled pension/ Rualbanlo mi 75-te hnenah pek mek a ni a. Naupang 6,793-te hnenah chaw tha (Nutritional Food) pek niin chhungkaw eizawngtu ber boral avanga tanpuina (NFBS) mi 23-te hnenah pek a ni bawk.

District chhunga Elementary School-a zirlai za zela 68.65 ten Aadhar enrolment an ti tawh a, Midday meal pawh tluang taka kalpui niin harsatna lian tham a awm lo a. Midday Meal Kitchen Shed thar 15 siam a ni. Champhaia Geology and Mineral Resources Department Office leh hmunhma neih ngei anih theih nan hmalak mek zel a nih thu meeting-ah hian tarlan a ni.

Agriculture Department hnuaiah RKVY leh ATMA kaltlanga hnathawh te pawh tarlan niin Lei thur tih tlemna, Fu huan siam, enkawl dan leh kuthnathawktute tana training hrang hrang buatsaih a ni. Intensive Bivoltine Sericulture Development Project (IBSDP) kaltlangin Silkworm khawi turin mi 1000 thlan an ni a, Integrated Muga Silk Development Project (IMDP) hnuaiah mi 60 thlan an ni bawk. RKVY scheme hnuaiah AH & Vety Department hmalaknain khaw 6-ah Sial tui tlan tur tuikhur 14 siam a ni a, ran vulhtute hnenah Arte, a insakna leh chawte pek an ni bawk.

Heng bakah hian CSS hnuaia hnathawh hrang hrangte sawiho a zirchianna neih a ni bawk.  Vawiin DISHA meeting-ah hian Pi Lalsangpuii Hmar, Addl DC, Department hrang hranga hotute leh khawtlang hruaitu leh NGO aiawh te an tel a ni.