Vawiin chawhnu khan Champhai DC Conference Hall-ah Addl. DC Pi Lalsangpuii Hmar kaihhruaiin NEDP hnuaia Chief Minister Rural Housing Scheme chungchang ngaihtuahtu District Level Selection Committee thutkhawm a ni a.
Meeting-ah hian kum 2017-2018 chhungin Champhai District-ah NEDP kaltlang a chhungkaw chenbeh zual 415 ten in sakna tur cheng Singnga theuh an dawn theihna tur ruahmanna lo siam tawh leh heta tana sum dah tawh cheng Nuai 207.50 chu a rang thei anga tih hlawhtlin thuai anih theih dan tur ngaihtuah a ni. Hmalakna hmasa atan, Champhai District chhunga RD Block-tinah Block Level Rural Housing Committee din thuai nise, Block 4 (Champhai, Khawzawl, Khawbung leh Ngopa RD Block) chhunga viltu tur bik Committee dinfel anih huna tanpuina dawngtu turte felfai taka thlan tha tih anih bakah kumin April thla chhungin (District Level CM's Rural Housing Scheme Launching Programme) neih dan turte ngaihtuah a ni a.
Rural Housing Scheme kal dan phung tur ruangam/ruahmanna sorkar-in alo duan tawh zulzui ang ngei a hmu tlak leh dawng tlak chhungkua te chauhin tanpuina an dawn theih nan fimkhur tak leh uluk taka thlang turin he thukhawm hian a ti a ni.
He thutkhawmah hian District Level Selection Committee member zing atangin Champhai District chhunga MLA 4 ; Tuichang Bialtu MLA Pu Lalrinliana Sailo, Champhai South Bialtu MLA Pu JH. Rothuama Champhai North Bialtu MLA Pu TT. Zothansanga, leh East Tuipui Bialtu MLA Pu T. Sangkunga-te bakah BDO 4, Khawzawl leh Ngopa SDO, NLUP/NEDP Line Departments, Sub-Hqrs. YMA, MUP, MHIP leh MJA-aiawhte an tel a ni.
