Nimin chawhnu khan Zobawk Sports Complex ah Lunglei  District Disaster Management  Authority leh YMA Sub Headquarters Lunglei tangkawp buatsaihin ni thum (26-28.Feb.2018) awh Search & Rescue  Training for Community Based Volunteers kharna neih a ni. Pu Lalthakima Chhangte MCS, SDC Lunglei chuan khuallian niin a hmanpui.

Search & Rescue Training kharna inkhawm hi Pu Lalramsanga, Chairman YMA Sub.Hqrs Disaster Committee kaihhruaiah Pu Lalthakima Chhangte chuan thusawiin Lunglei District Diasaster Management Authority leh YMA Sub.hqrs tangkawp in an buatsaih  Search & Rescue Training neih a ni chu lawmawm a ti a. Search and Rescue Training chu Sawrkarin a ngaih pawimawh takzet thu sawiin, vanduaina tawh palh a, thiamna bik nei ten an thiamna ngawihbo pui lovin engtik hunah pawh rawngbawlna anga hmanga, inpuahchah a, tanpui ngaite tanpui theuh turin kalkhawmte a chah a.

Pu R.Lalnunthara President YMA Sub.Hqrs pawhin thusawiin,  YMA Sub.Hqrs ah hian Committee peng hrang hrang zinga pakhat  Disaster Management Comittee hi mihring thihna leh dam kara hmalatu niin rikrum thil a chechhuak thei tura training buatsaih a ni hi a lawmawm takzet a ni, a ti. Tlang rama cheng kan ni a,  leimin, tuilian, kham a tla, leh chetsualna hrang hranga che thei tur mithiam kan mamawhin mipuite pawhin chhawr tangkai ka beisei tiin training a tel te chu midangte tana malsawmna ni turin leh zirtirtu ni theuh turin a chah a ni.

Training chhung hian tlang lawn, kham a mihring tla chhar dan, kangmei chhuaha chhanchhuah dan, zanlam a rikrum thil a chetchhuah dan, hliam chhanchhuah dan te zirna neih a ni. Training hi Lunglei khawpui YMA branch  hrang hrang bakah Govt J.Buana College leh Lunglei Govt College te atangin mi 14 in training hi an nei. National Disaster Responce Force (NDRF) hnuaia training chhuak (instructor) 5 ten training hi an pe a ni, Training chhuakte hi Certificate pek vek an ni. Pi Chuaupari  Pachuau District Coordinator DM&R in lawmthu sawina in hun a khar a ni.