Vawiin chawhnu khan Govt. Model English Medium Primary School, Ramhlun North chuan an kum 50 din champha lawmna hun an nei a. School Education Minister, Pu H. Rohluna chu Khuallian a ni.

Khuallian Pu H. Rohluna chuan zirna hi hnam siamna atana bul thut pawimawh tak a ni, a ti a. Elementary education bikah hian khawtlanga mi thahnemngai tak tak nena tangkawpa thawhhona a awm thin a ni tiin anmahni vang pawh hian hmasawnna a tam phah a ni, a ti a. Kum 2016 khan School Education  Department hmalaknain district hrang hrang ah sawrkar primary school thenkhat chu model school atan thlan chhuah an nih thu sawiin zirna hmasawnna atan a nih thu a sawi a. School tha ni tur chuan zirna bakah nu leh pa ngaihtha taka siam te, zirlai naupang thlamuang taka awm tir te hi a pawimawh em em a ni, a ti a. Sawkar laipuiin sawrkar leh private school-a zirtirtute training an neih ngeina tur thuchhuah a siam thu sawiin hemi atan hian NIOS hnuaia Open Distance Learning (ODL)-ah school hrang hranga zirtirtute an in ziahluh tawh ngei a beisei thu a sawi a. He ODL training hmalakna hi zirna mumal lehzuala zirna kalpui a nih theihna tur a nih thu a tarlang a. Zirlaite chu nakin lawka ram hruaitu turte an nih thu sawiin zirtirtute chuan inpekna thar nena tan la turin a fuih a. Govt. Model English Medium Primary School, Ramhlun North chu model school a nih angin school dangte entawntlak ni turin a chah a, an kal zelna turah duhsakna a hlan nghal a. Minister hian School tan Computer set 1 a pe a, school souvenir a tlangzarh nghal bawk a ni.

Khualzahawm Pu Lalthanliana, MLA pawhin thu sawiin Govt. Model English Medium Primary School, Ramhlun North kum 50 lai a lo tling ta chu lawmawm a tih thu a sawi a. School tana thahnemngai taka thawkte chu fakawm a tih thu sawiin hmasawnna tur atan zirna a pawimawh thu a sawi a. Zirlai naupangte kal zelna turah zirtirtu leh nu leh pa ten mawhphurna sang tak an nei a, naupangte hian an tuina zawnga an kal theih nan ngaihtuahpui an mamawh a ni , a ti.   

Govt. Model English Medium Primary School hi March Ni 1, 1968 khan din niin a tira a hming chu Govt. Primary School II tih a ni a. Kum 1999 atang hian Govt. Ramhlun North Primary School tih a thlak a ni a, kum 2016 khan Aizawl khawpui chhunga school pali, Model English Medium atana thlan zingah  telin Govt. Model English Medium Primary School tih a lo ni ta a ni. Tun dinhmunah hian zirtirtu 12 awmin zirlai 123 an awm mek a. Govt. Model English Medium Primary School, Ramhlun North hian kum 1996, 1998, 2006 leh 2017 khan school fai lawmman a lo dawng tawh thin a ni.

Headmaster Pu C. Biaknghinglova chuan kalkhawmte lawmna thu sawiin programme a kaihruai a. Pu K. Vanlalrova hnen atangin school report kimchang tak ngaihthlak a ni a. Khualzahawm AMC Councillor Pu K. Romawia chuan thu sawina hun a nei a. Govt. Model English Medium Primary School zirtirtu Pu Biakkima chuan lawmthu sawina in hun a khar a. School Education Department hotute, Govt. Model English Medium Primary School zirtirtu lo ni tawhte leh zirchhuakte an tel a ni.