Vawiin khan Lawngtlai District Legal Services Authority bul tumin Lawngtlai DC office complex-ah Legal Services Camp buatsaih a ni a. Lawngtlaia sawrkar department hrang hrang leh bank-te’n stall siamin, he’ngah hian mipuite’n hriat duh an neihte an zawt fiah hlawm a ni.

Lawngtlai DC Conference Hall-a hawnna inkhawm buatsaih chu Mizoram State Legal Services Authority (SLSA) Member Secretary Pu Vanlalenmawia MJS chuan kaihruaiin, Legal Services Camp buatsaih a nih chhan leh LSA hma lakna hrang hrang a sawi fiah a. Khuallian, Lawngtlai Bawrhsap Dr Arun T., IAS chuan camp buatsaih a ni chu lawmawm a tih thu sawiin, hriatna chu mihringte hnena thiltihtheihna leh huaisenna petu a ni a, mipuite’n dan hnuaia kan chanvote kan hriat a pawimawh a ni, a ti. He hunah hian Senior Medical Officer Dr S. Thaizi, DRDA Project Director Pu R. Lalremsanga MCS leh Public Prosecutor Pu Malsawmdawngliana te pawhin thu an sawi a. Lawngtlai DLSA Member Secretary Pu BT Lala Sakachep MJS chuan lawm thu a sawi a. Hemi hnu hian stall fan kual niin, Khuallian chuan camp chu mipui dawr theihin a hawng nghal a ni.

Vawiina Legal Services Camp buatsaihah hian department 18-in stall an siam a. An department hnuaia scheme leh hma lakna hrang hrangte chu mipuiin chiang zawka an hriat theih tura chhawp chhuakin, zawhna te an chhang a. Mipuite’n hun leh tha senga office hrang hrang dawra kal kual ngai lovin, he hunah hian an hriat duh thil hrang hrang chu hmun khatah awlsam takin an hre zung zung thei a ni.