Vawiin khan Champhai DC’s Conference Hall, Keifangtlangah District chhunga Central sawrkar sum hmanga hmasawnna hnathawh programme 28-te enzuitu Committee; District Development Co-ordination & Monitoring Committee (DDCMC/DISHA) chu an Chairman Pu CL Ruala, MP (Lok Sabha) hovin an thukhawm. Meeting-ah hian Co-Chairman Pu Ronald Sapa Tlau, M.P (Rajya Sabha), Pu Ramthanmawia, MLA East Tuipui A/C leh Champhai DC Dr Naveen Aggarwal, IAS te pawh an tel a ni.
Pu CL Ruala chuan DISHA Meeting chu Champhai District chhunga sawrkar department hrang hrangte hnathawh enzuitu anih thu a tarlangin Commiittee pawimawh tak anih avangin District tana hnathawh leh hmachhawp siam kawngah kawngro a su em em a ni, a ti a. Chairman chuan Lok Sabha term a lo tawp dawn tawh avangin atan chuan DISHA Chairman anga hun a hman hnuhnung ber anih tawh dawn thu sawiin, tunhma kum 10 kalta chhunga District Official-te tawiawmna leh thlawpnaah lawmthu a sawi a. Chairman thar an lo awm hunah pawh lungrual taka ram leh hnam tana thawk tlang zel turin a chah a. Sawrkar hnathawkte chu Sawrkar inthlak chang awm mahse an danglam ve loh avangin an kutah District mai bakah Mizoram hmasawnna a innghah tlat thu leh rinawmna, taihmakna leh huaisenna thinlungpu chunga hnathawk thin turin a fuih bawk a ni.
Co-Chairman Pu Ronald Sapa Tlau pawhin thusawiin, Chairman kalchhuak mai tur hnuaiah District hrang hranga sawrkar laipui kaltlanga hnathawhte chak taka enzui thin anih thu a sawi a. Ram leh hnam tana theihtawp lo chhuah thin tawhtu Pu CL Ruala chu a kalzelna turah duhsakna a hlan nghal a ni. DISHA Member pawhin Chairman kalchhuak tur thlahna thu an sawi a ni.
Meeting tarlan dan chuan Rural Development hmalakna MGNREGA hnuaiah kum 2018-2019 chhungin Job Card holders 28865 hnenah ni 82 inhlawhna siam sak a ni a, hemi hun chhung hian cheng nuai 6139.41 hmangin hna 719 kalpui a ni. April 2017 atanga kalpui tan Pradhan Mantri Awaas Yojana-Gramin, PMAY-G (Rural Housing Scheme) hnuaiah beneficiary mi 146 te hnenah insak tanpuina pek niin, In 127 sak zawh tawh a ni a. District chhungah Integrated Watershed Management Project (IWMP) pasarih kalpui mek a ni a. MGNREGA hnuaiah hian Champhai leh a chhehvelah DRDA Champhai, Institute of Bioresource Technology (IHBT), Palampur, Himachal Pradesh leh Horticulture Department-te nena thawkhoin Apple Plantation Programme kum 2015 tang khan neih a ni a, Apple rah hmasa te chu Palampur-ah enchhin tura thawn tawh niin, a that thu tarlan ani bawk.
Saubhagya Scheme hnuaiah a thlawnin electric eng District chhunga In 1854 ahte pek tawh niin, heng zinga 1083 hi Champhai Power Project Division huamchhunga mi an ni a, a dang 771 chu Khawzawl Power Project Division hnuaia mi te an ni. PHE Department hmalaknain District chhungah Tui lakna hmun 8 ah kalpui mek a ni a. UD&PA hnuai PMAY-U hmalaknain Champhai khawpuiah In 2285 leh Biateah In 164 sak tura pawm a ni a, First Phase-ah hian Champhaiah In 898 leh Biateah In 52 te thlan an ni. Meeting chuan I&WR Department kaltlanga tuilakna tha leh hnianghnar zawk buh leh thlai chawm thei siam thei turin hmalak nise a ti a, a tul angte Bawrhsap kaihhruaina hnuaiah lo enzui nise a ti bawk.
National Health Mission hnuaiah July-December 2018 chhungin Naupiang 909 an awm a, nausen thi 15 awmin IMR chu 16.50 a ni a. Nu nau chunga thi 2 awmin MMR chu 220.02 a ni. A nawlpuia thisen test mi 4118 zinga 137 chu HIV positive an ni a, kai thar za zela 43.06 te chu kum 25-34 inkar an ni a. HIV vei thar za zela 58.39 chu Mipat hmeichhiatna hman khawloh vang ani a, Integrated Counselling and Testing Centre kaltlangin naupai mi 87 te chu HIV positive an ni tih hmuhchhuah a ni bawk. TB rinhlelh test mi 384 zinga 79 te chuan TB an vei a, Multi-Drug Resistance TB rinhlelh 295 test zinga mi 4 te chuan an vei tih finfiah a ni bawk. Damlo khawsik thisen test 12972 zingah Malaria vei hmuh a ni lo bawk. National Tobacco Control Programme (NTCP) hnuaiah Tobacco Squad Drive tum 39 , Awareness tum 29 leh Training tum 2 neih a ni a. Hemi hmang hian Vaihlo leh a kaihhhnawih bansan za zela 24.30 an awm phah a ni. Rastriya Bal Swasthya Karyakram (RBSK) hnuaiah Anganwadi leh School naupang 15713 te hriselna endik a ni.
National Social Assistance Programme (NSAP) hnuaiah tar chawmna/ Tar pension mi 2785, Hmeithai pension mi 269 leh Disabled pension/ Rualbanlo mi 76-te hnenah pek mek niin, Naupang 16326-te hnenah chaw tha (Nutritional Food) pek an ni a. Sericulture Department leh Central Silk Board hmalaknain Integrated Muga Silk Development Project (IMSDP) hnuaiah chhungkaw 60 ten Muga pangang an khawi a, Blue Revolution hmangin District chhungah Sangha thar tam zawk nan hnathawh mek zel a ni bawk. Education Department kaltlangin Children Science Congress, Kala Utsav, Sports Meet te huaihawt niin, Mid Day Meal kalpui zel a ni bawk.
Heng bakah hian CSS hnuaia hnathawh hrang hrangte sawiho a zirchianna neih a ni a.
