Vawiin hian Serchhip Bazar-ah Horticulture Department buatsaihin Thlai Thar Kut- 2019 buatsaih ani a, Pu Rodney L. Ralte, Secretary to the Government of Mizoram, Horticulture Department chuan he kut hi a hawng.

Pi Margareth Vanlalzami, Serchhip DHO kaihhruai, a hawnna inkhawm tawi Bazar Building-a buaisaihah Pu Rodney L. Ralte chuan Serchhip Zawlpui leh a chhehvela loneitute thlai tharchhuah chu Aizawl mipuite innghahna ber a ni tawh tih a sawi a. Zawlpui Behchhan Agri & Horti Society mumal tak an nei chu tha a tih thusawiin, an thlai tharchhuah zat te mumal taka chhinchhiaha, data felfai neih tum tura ngenin chu chuan sawrkar laipui dawr a tiawl sawt dawn ani, a ti bawk. Pu Rodney L Ralte hian Zawlpuia thlasik thlai chingtu hlawhtling tak Pu Lalzemawia hnenah a bik takin lawmman a hlan a. Pu Lalzemawia hian nikum khan thlasik thlai atangin cheng nuaih sawm (Rs. 10 lakh) chuang a lei a, kuminah pawh hian Zikhlum bi nuaih khat (1 lakh) chuang, Bawkbawn leh Samtawk kung 8000 chuang a enkawl leh mek a ni. 

Dr. Elizabeth Saipari, Director Horticulture Department pawhin thusawiin, Zawlpui behchhan lo-huan neitute chu an tharchhuah hlu tak avangin Mizoram Economy tana thawhhlawktute zinga mi an ni, a ti a. An tan Sailiamkawnah Cold Chain Storage sak tuma hmalak mek a ni, a ti a. Department tha taka an thawhpui thin avangin lawmthu a hrilh bawk a ni.

Agri & Horti Society Chairman Pu PC Siamliana pawhin thusawiin, sawrkar in Zawlpui leh a chhehvela lo-huan neitute a ngaihsak avangin an lawm thin hle tih a sawi a. Hmun thenkhatah Zawlpui thlaite chu hlo tur (chemical) hmang nasa anga sawi an lo awm thin chu pawi an ti hle tih sawiin, keini a chingtute ngei pawh hian nitin kan thlai thar ngei hi kan ei tlauh tlauh a. Hei hian chemical hlauhawm kan hmang lo a ni tih chu a tifiahin ka hria a ti a. Zawlpui thlaite chu lei ngam, ei ngam ngei an ni tih Mizoram mipuiten min hriat sak se a duh tih a sawi a ni.

Hun hman zawh hian loneitu za chuang ten an thlai tharte chu man tlawm zawkin mipuite hnenah an hralhchhuak a. Serchhip mipui leh khualzin kal vel ten an hlut hle a ni.

Attachment

  • Loading attachment...