No.6962/2020-2021   

Vawiin khan Champhai DC’s Conference Hall, Keifangtlangah District chhunga Central sawrkar sum hmanga hmasawnna hnathawh programme hrang hrangte  enzuitu Committee; District Development Co-ordination & Monitoring Committee (DDCMC/DISHA) chu an Chairman Pu C.Lalrosanga, MP (Lok Sabha) hovin an thukhawm. Meeting-ah hian  Champhai District chhunga Assembly Constituency 3 bialtute, Pu T.J. Lalnuntluanga MLA, Champhai South A/C, Dr. Z.R Thiamsanga MLA, Champhai North A/C leh Pu Ramthanmawia MLA, East Tuipui A/C leh Champhai DC Pi Maria C.T Zuali te pawh an tel a ni.

Pu C.Lalrosanga chuan DISHA meeting Champhaia neih tura lo ruahman lawk tawh a taka tihhlawhtlin  a ni thei chu lawmawm a tih thu sawiin, sawrkar laipui scheme pawimawh tak takte chu tha taka kalpui ani em tih hi sawrkar laipuiin a ngaihven renga, chak zawka kalpui tur chuan line department hrang hrangte thawhho thiam a tul a ni,  a ti. A taka thawktu  Official te’n an hnathawh dan chiang taka an sawifiah leh inhriatpuitawnna tura inrawnkhawmna buatsaih chuan rah tha tak a chhuah theih avangin DISHA meeting chu ngaihpawimawh thin a ni a,  Committee pawimawh tak anih avangin district tana hnathawh leh hmachhawp siam kawngah kawngro a su thui hle a ni a ti bawk. Sawrkar department hrang hrangte hunbi ruata hnathawh zo hman tum tura chahin an rawngbawlsak mipuite tana theihtawp chhuah turin  a fuih nghal a ni. 

Meeting-a tarlan anih  dan chuan DRDA Champhai hmalakna MGNREGA hnuaiah kum 2020-2021 chhungin   Job Card  holders 29,869 hnenah ni 80 inhlawhna November thla thlenga siam a ni a.  April 2017 atanga kalpui tan Pradhan Mantri Awaas Yojana-Gramin, PMAY-G (Rural Housing Scheme) hnuaia beneficiary mi 287 te hnenah insak tanpuina pek niin, In 234 te chu sak zawh tawh a ni a. District chhunga Pradhan Mantri Krishi Sinchayee Yojana (PMKSY) pasarih kalpui zinga 1 la thawh chhunzawm mek niin, 2 zawhfel tawh a ni a, 4 dangte tawpsan rih  a ni. PHE Department hmalakna Jal Jeevan Mission (JMM) hmangin district chhungah tuilakna khaw 15 tan siam a ni a, 11 te zawh tawh niin 4 dangte thawhna tur fund hmuh fel tawh a ni. PWD hnuaiah Pradhan Mantri  Gram Sadak Yojana (PMGSY)  kawng 21 awm meka 10 te zawhfel tawh  a ni bawk. Meeting chuan chak zawka PMGSY kawngte thawh anih theihna turin Bawrhsap hova enzui thin nise a ti a. Optical Ground Wire (OPGW) kaltlanga inbiakpawhna lama harsatna awmte sutkiana hmalak anih theih dan turte ngaihtuah nise tih a ni bawk. 

NLM 2018-2019 hnuai Rural Backyard Goatery kaltlangin Champhaiah Kel vulh chhungkaw 4 leh Khawzawlah chhungkaw 4 an awm a. Fisheries department hnuaia Blue Revolution Scheme hnuaiah beneficiary 44 an awm mek bawk  a ni. Pradhan Mantri Krishi Sinchayee Yojana (PMKSY) ‘Har Khet Ko Pani’ tih scheme hmangin MIP 7 kalpui mek anih bakah a vawikhatna turin  Ground Water Irrigation Scheme kaltlangin  leihnuai  verh hmanga tuilakna tur project 4 kum thar atanga kalpui tan tum niin, hmun hnihah lei verh chhin anih tawh thu tarlan  a ni bawk. 

National Health Mission hnuaiah April-November 2020 chhungin  Naupiang  1382 an awm a, nausen thi 23 awmin IMR chu 16.64 a ni a.  Nu nau chunga thi 1 awmin MMR chu 72.36 a ni.  ART Centre-a inziaklut mi 1966 awmin OST Centre-a inziaklut mi 1030 an awm bawk. Blindness Programme hmangin Zirlai Tarmit vuah ngai 150 te hnenah a thlawnin tarmit pek a ni a, Vector Borne Disease Control Programme kaltlangin  Malaria case 20 hmuh niin thihpui an awm lo  a ni.   TB rinhlelh test mi 464 zinga 32 te chuan TB an vei a, Multi-Drug Resistance TB rinhlelh 243 test zinga mi 2 te chuan an vei tih finfiah a ni bawk.  National Tobacco Control Programme (NTCP) hnuaiah  Nicotine Replacement Therapy la mi 450 zingah Vaihlo leh a kaihhhnawih bansan za zela 9.95 an awm bawk a ni. National Social Assistance Programme (NSAP) hnuaiah tar chawmna/ Tar pension mi 2782, Hmeithai pension mi 269 leh Disabled pension/ Rualbanlo mi 76-te  pek mek niin, ICDS Project hnuaia Anganwadi Centre 275 kaltlangin naupang, rai puar leh a dang  mi 14730 te’n April-November chhung khan chaw tha an dawng  a ni.  Tun thlengin raipuar tanpuina Pradhan Mantri Matru Vandana Yojana kaltlangin mi 2197 te’n chhawmdawlna an hmu tawh bawk a ni. 

Heng bakah hian CSS hnuaia hnathawh hrang hrangte sawiho a zirchian a ni bawk.  Meeting zawh hnu hian Lok Sabha MP Pu C.Lalrosanga chuan Indo-Myanmar ramri depa awm sumdawnna hmunpui Zokhawthar chu a tlawh a ni.