No.6961/2020-2021   

Vawiin khan School Education Minister Pu Lalchhandama Ralte chuan Mizoram Hindi Prachar Sabha Office MINECO-ah Hindi field-a Padma Shree dawngte leh Doctorate degree neite chawimawina hun a hmanpui.

He chawimawina hunah hian Pu Lalchhandama Ralte chuan thu sawiin India ram inpumkhat nan Hindi thiam a pawimawh hle a ni, a ti a. Mizoram sorkara thuneitu sang rualte leh officer te pawh phaia kal nikhuaa Hindi-a tawng hlei thei lo tam tak an awm avangin Prachar Sabha pawhin nasa zawka hma a lak a tul hle a ni, a ti bawk. Hindi hi Middle leh High school chinah chauh zirtir a ni a, Primary school atangin zirtir ni ta se naupang ten an man chak zawk ang em tih ngaihtuah a ngai a ni, a ti.

Minister chuan School hrang hrang Hindi zirtirtu nei lote chu sorkarin zirtirtu pek a duh a, hemi atan hian Central sorkarah 950 dil ah 650 pek kan nih thu leh Hindi teacher hna lakah diltu ten an daih lo zawk tih sawiin Hindi thiam mamawhna a sang hle a ni, a ti a. Tun dinhmunah chuan Hindi teacher nawr belh zel chu thil tih chi a ni lo tiin thalai Hindi thiam kan indaih lo a ni, a ti.

Mizoram Hindi Prachar Sabha hian vawiina chawimawina hun an hmanah hian Padma Shree dawng pakhat leh Hindi- zirna kawnga Doctorate degree nei mi 13 te chawimawina thuziak an hlan a ni.

Hindi Prachar Sabha hi kum 1954 khan bul tan a ni a, kum 2017 atang khan office building MINECO ah an nei a, School leh College 30 chuangah Hindi zirna an kalpui mek a, tun hnaia School Education Department-a Hindi Teacher lak thar zinga a tam ber chu Mizoram Hindi Prachar Sabha hnuaia zir te an ni tih John PC Rema Secretary, Hindi Prachar Sabha chuan a report a, an hnena zir chhuakte zingah Missionary leh Pastorte pawh an awm nual tih a sawi bawk.

Vawiina chawimawina hun hi Pu RB Lalmalsawma Chairman Mizoram Hindi Prachar Sabha chuan a kaihruai a, Padma Shree dawngtu leh Doctorate degree neitute, Hindi Prachar Sabha hotute leh thawktute an tel a ni.