1901/2022-2023
Champhai, 13th September, 2022: Champhai District chhunga Central Sawrkar sum hmanga hmasawnna hnathawh Scheme hrang hrangte zirchianga enfiahtu, District Development Co-ordination & Monitoring Committee (DDCMC/DISHA) chu an Chairman Pu C.Lalrosanga, Member of Parliament (MP), Lok Sabha (LS) hovin vawiin khan DC Conference Hall-ah an thukhawm. He hunah hian 2021-2022 financial year third leh last quarter bakah 2022-2023 financial year first leh second quarter chhunga hmalakna hrang hrangte thlirho a ni.

Chairman Pu C.Lalrosanga chuan Sawrkar hnathawk leh mipui aiawhte inkarah thawhhona tha zawk siam a pawimawh thu sawiin, DISHA kaltlangin hmasawnna ruhrel siamte tluang taka thawh a nih theih nana inrawnkhawmna leh inpawhtlanna tha zawk siam zel tum a ni a, DISHA meeting chu Central sawrkarin a ngaipawimawh a ni, a ti a. Ramri depa awm Champhai District chu district pawimawh berte zinga mi a nih thu sawiin, Sawrkar laipuiin hmalaknate uluk taka a vil reng thu leh a bikin ramri depa hnathawh leh thil thlengte a ngaihven zual thu a sawi a. NGO te chu ram tana hna tha leh rotling siam a nih theih nan central scheme thawhte vilpuia ngaihven turin a sawm a. Ruihhlo tawlhruk ven kawnga Police, Excise, Assam Rifles leh NGO te hmalakna fakawm tiin, NHIDCL hotute pawh hun bituk chhunga NH 6 kawng siam hna tha leh tlo zo fel hman turin a chah bawk a. Sawrkar Department leh Banker-te chu Sawrkar laipui scheme pawimawh tak takte a chhawr tangkaitu tur mipuite hnena puangzar tam tur leh an chhawr tangkai ngei theih nana hma la turin a chah a ni.

Meeting-a tarlan a nih danin MGNREGA hnuaiah 2021-2022 financial year chhung khan job card holder 17,704 te hnenah ni 98 inhlawhna siam niin, 2022-2023 financial year kal mek August thla zawh thleng khan job card holder 17,857 te hnenah ni 42 inhlawhna siam a ni tawh a. PMAY-G Awaas+ hnuaiah hamthatna dawng tur mi 259 thlan an ni a, Pradhan Mantri Krishi Sinchayee Yojana, WDC-PMKSY 2.0 hnuaia hmalakna project 2 kalpui mek a ni a. BADP hnuaiah hna 17; cheng nuai 217 senga thawh niin, Mission Amrit Sarovar kaltlangin hmun 34 ah hmalak tawh a ni bawk.

PHE Department hmalakna Jal Jeevan Mission (JMM) 2021-2022 hmangin khaw 7 ah Water Supply Scheme thawh zawh niin, 2022-2023 atan khaw 30 ah hmalak mek a ni a. NABARD RIDF-24 hnuaiah Hnahlan Water Supply Scheme (Solar Pumping) thawh zawh niin, NLCPR hnuaiah Keilungliah lui khuah hna za zela 98 zawh fel tawh a ni bawk a. PWD hnuaiah Pradhan Mantri Gram Sadak Yojana (PMGSY) kawng la siam zawh loh 4 te September 2022 chhunga zawhfel hman tum a ni a. Pradhan Mantri Krishi Sinchayee Yojana (PMKSY) ‘Har Khet Ko Pani’ hnuaia Minor Irrigation Project 5 kalpui mekte zawhfel tep a a nih hlawm bakah a vawikhatna turin Ground Water Irrigation Scheme kaltlangin leihnuai verh hmanga tuilakna tur project 4 kalpui mek a ni bawk.

April-June 2022 quarter chhungin nausen thi 8 awmin Infant Mortality Rate (IMR) chu 21.27 a ni a. Nu nau chunga thi 2 awmin Maternal Mortality Rate (MMR) chu 531.91 a ni a. October 2021 atanga July 2022 chhungin mi nawlpuia HIV test tihsak mi 3555 zingah 125 (6.82%) an positive a. Naupai mi 2264 test zinga 17 (0.77%) an positive bawk a. HIV positive zingah mipat hmeichhiatna hmanga kai an tam ber a ni. Hemi hun chhung vek hian Vector Borne Disease Control Programme kaltlangin malaria case 17; Pf 9 leh Pv 8 hmuh a ni a. Dengue vei hmuh a awm lova, TB vei hmuhchhuah 114 zinga 10 ten an thihpui a ni.

Champhai District-ah Ration Card leh Aadhaar thlunzawm hna za zela 94.22 zawh tawh niin, beneficiary nena thlunzawm hna chu za zela 86.79 zawhfel a ni a. National Social Assistance Programme (NSAP) hnuaiah tar chawmna/ tar pension mi 1337, hmeithai pension mi 153 leh rualbanlo pension mi 37 te pek mek a ni a. Heng bakah hian CSS hnuaia hnathawh hrang hrangte sawiho a zirchian a ni bawk.

Vawiin DISHA thutkhawmah hian Champhai District chhunga Assembly Constituency 3 MLA; Pu T.J. Lalnuntluanga, MLA, Champhai South A/C, Pu Ramthanmawia, MLA, East Tuipui A/C, Dr. Z.R Thiamsanga, MLA, Champhai North A/C, Member Secretary Pu James Lalrinchhana, DC; Pu B.Lalchhawntlua nga, PD, DRDA leh CSS khawih Department hrang hrang hotute, DISHA member dangte, NHIDCL leh NABARD hotute an tel a ni.

Attachment

  • Loading attachment...