1902/2022-2023
Aizawl, 13th September, 2022 : Ni thum cham tura Mizoram vawiina rawn thleng Union Minister of State for Rural Development, Consumer Affairs, Food & Public Distribution Pi Sadhvi Niranjan Jyoti chuan vawiin chawhnu khan Vaivakawn chawhmeh bazar tlawhin bazara chawhmeh zuartute nen an inkawm.

Pi Sadhvi hian vawiin chhun khan Lengpui Airport rawn thlengin Rural Development Minister Pu Lalruatkima'n a lo hmuak a, Chief Minister Pu Zoramthanga Delhi zin tur nen Lengpuiah hian an inkawm nghal bawk a ni. Lengpui atangin Vaivakawn bazar panpui nghal niin bazara thlai thar zuarte tlawhin a kawm a, Vaivakawn bazar chanchin a lo hriat tawh thu leh nuho hlirin dawr an nghak tih a hriatin a tlawh chak hle tih a sawi a. Mizoram chu a thlen chinah nuam a tih thu leh ram mawi tak a ni tih sawiin amah pawh thingtlanga pianga seilian, thingtlangnu ve mai ka ni a, VIP angah pawh ka inngai lova, in zingah hian ka mikhual lo a ni, a ti a. Prime Minister Narendra Modi-a'n India hmarchhak a ngaih pawimawh thu sawiin ani thuchhuak anga rawn kal a nih thu a sawi a, Consumer ten harsatna an tawh angte a hnena an thlen chuan sutkiansak dan kawng a zawnpui tur thu a sawi a ni.

Bazar enkawltuten harsatna an thlen pakhat Vaivakawn bazar building sak thatsak tura an ngenna chu rural development ministry ka chan a nih avangin rural area a awm chu ni se thupek ka chhuah nghal thei a, urban area a awm a nih avangin project proposal te an siam a nih chuan theihtawp chhuaha a lo bawhzuisak tur thu a sawi thung a ni.

Union MoS hi zaninah Mizoram Larsap Dr. Hari Babu Kambhampati nen Raj Bhavan-ah inkawmin Raj Bhavan-ah hian a riak nghal dawn a, naktuk hian Mizorama 'Aspirational District' kan neih chhun Mamit District a tlawh ang.