624/2023-2024

Champhai, 30th May, 2023: Champhai District chhunga Central Sawrkar sum hmanga hmasawnna hnathawh Scheme hrang hrangte zirchianga enfiahtu, District Development Co-ordination & Monitoring Committee (DDCMC/DISHA) chu an Chairman Pu C.Lalrosanga, Member of Parliament (MP), Lok Sabha (LS) hovin vawiin chawhma dar 11 khan DC Conference Hall-ah an thukhawm. He hunah hian 2022-2023 financial year third quarter leh final quarter (October 2022 atanga March 2023) chhunga hmalakna hrang hrangte thlirho a ni a. DISHA Co-Chairman Pu K.Vanlalvena, Member of Parliament (MP), Rajya Sabha (RS) pawhin he hun hi a telpui bawk.

Chairman Pu C.Lalrosanga chuan DISHA meeting-in a huam Centrally Sponsored Scheme (CSS) te Mizoramah tangkai taka chhawr a ni chu lawmawm a tih thu sawiin, hmuh leh hriat theih chinah hengte hi tha taka hman a ni, a ti a. Sawrkar laipui atanga a hun taka fund hmuh a nih loh avanga harsatna awm chang pawha theihtawp chhuah a ni thin chu fakawm a tih thu a sawi a. Sawrkar laipuiin Information Technology leh Digitization lamah tan lain nasa taka kalphung a thlak thu pawh tarlangin, harsatna kan tawh loh nan hemi kawngah pawh hian theihtawp chhuaha kan insiamrem ve zel a tul a ni, a ti a. DISHA meeting kokim berte zinga mi Champhaia neih a ni chu ropui a tih thu a sawi a. Sawrkar scheme pawimawh hrang hrangte mipuite'n an hmelhriata an chhawr tangkai theihna turin zau zawka inhrilhhriatna leh inzirtirna neih a tul thu a sawi bawk.

Meeting-a tarlan a nih danin MGNREGA hnuaiah 2022-2023 financial year chhung khan job card holder 18,132 te hnenah ni 100 inhlawhna siam hman niin, PMAY-G Awaas+ 2021-2022 hnuaiah insak hamthatna dawng tur mi 372 thlan an ni a, heng zinga 209 te first installment pek an ni. Pradhan Mantri Krishi Sinchayee Yojana, WDC-PMKSY 2.0 hnuaia hmalakna project 2 cheng nuai 700 ve ve senna tur kalpui mek a ni a, hengahte hian Sawkar laipui tum tur fund 19.45% hmuh tawh a ni. BADP hnuaiah hna 17, cheng nuai 253 senga thawh niin heng zinga 16 te hi tun dinhmunah zawhfel tawh an ni a. MzSRLM hnuaiah SHG 648 din a ni tawh a. Kum 2020 atanga kalpui tan Mission Amrit Sarovar kaltlangin hmun 80 ah dil/tuikhuah siam zawh a ni tawh bawk.

PHE Department hmalakna Jal Jeevan Mission (JMM) kaltlangin project 12 zawhfel tawh niin, 2022-2023 atan Champhai District chhunga khaw 30 ah tuilakna leh in tina tui connection pekna tur project kalpui chhoh mek a ni a. NABARD RIDF- XXVIII hnuaiah Farkawn Water Supply Scheme (Solar pumping) cheng nuai 1595.72 hmanga siam tur tender chhuah fel tawh a ni a. NLCPR hnuaiah cheng nuai 1988 senga siam Keilungliah lui khuah chu hawn fel a ni tawh bawk a. PWD hnuaiah Pradhan Mantri Gram Sadak Yojana (PMGSY) kawng 4, km 53.9 a thui siam zawhfel a ni a. Pradhan Mantri Krishi Sinchayee Yojana (PMKSY) ‘Har Khet Ko Pani’ hnuaia Minor Irrigation Project 7 bakah NABARD hnuaiah project 1 kalpui a ni a. Ground Water Irrigation Scheme kaltlangin leihnuai tui verh hmanga tuilakna tur project 4 kalpui niin, heng zinga pakhat hi Mizorama leihnuai tuiverh hmanga tuilakna hmasa ber ni turin hawnfel a ni a. P&E Department-in NABARD RIDF kaltlangin zau hrang hrang 4 ah electric power pekna tur buaipui mekin, project 1 zawhfel a ni.

Hemi hun chhung hian nausen piang 862 leh thi 12 awmin Infant Mortality Rate (IMR) chu 20.88 a ni a. Nu nau chunga thi 1 awmin Maternal Mortality Rate (MMR) chu 116 a ni a. Health Sub-Centre 30 te Health & Wellness Centre-ah hlankai vek tawh an ni a, Sub-Centre Clinic 15 siam a ni bawk. Mi nawlpuiah HIV test tihsak mi 1944 zingah 62 (3.19%) an positive a. Naupai mi 1362 test zinga 7 (0.51%) an positive bawk a. HIV positive zingah mipat hmeichhiatna hmanga kai an tam ber a ni. Vector Borne Disease Control Programme kaltlangin malaria case 9; Pf 6 leh Pv 3 hmuh a ni a. TB vei hmuhchhuah 68 zinga 5 te'n an thihpui a. Samagra Shiksha kaltlangin cheng nuai 225.48 sengin Sikul sak that, toilet leh tui dahkhawlna siam hnate thawh a ni.

Champhai District-ah Ration Card leh Aadhaar thlunzawm hna za zela 99.21 zawh tawh niin, beneficiary nena thlunzawm hna chu za zela 94.16 zawhfel a ni a. AAY Card 1,824 hnuaiah beneficiary 4,196 leh PHH Card 9,381 hnuaiah beneficiary 41,212 awmin, an tan hian a thlawnin buhfai quintal 16,428.40 pek chhuah a ni a, One Nation One Ration Card kalpui mek a ni bawk. National Social Assistance Programme (NSAP) hnuaiah tar chawmna/ tar pension mi 1337, hmeithai pension mi 153 leh rualbanlo pension mi 37 te pek mek a ni a. Heng bakah hian Agriculture Department atangin PMKSY, RAD leh NFSM Scheme-te, District Industry Centre atangin PMEGP, A.H & Vety atangin NLM, Fisheries Department atangin PMMSY leh Article 275 (1) of the Constitution-te, Land Resources, Soil & Water Conservation Department atangin NABAR-RIDF XXVII hnuaia hmalaknate, Women & Child Welfare Department atangin Poshan 2.0, Mission Shakti leh Mission Vatsalya kaltlanga hmalaknate ngaihthlak a ni bawk.

Vawiin DISHA thutkhawmah hian Champhai District chhunga Assembly Constituency 3 MLA; Law & Judicial Minister Pu T.J. Lalnuntluanga, MLA, Champhai South A/C, Health & Family Welfare Board Vice Chairman Dr. Z.R Thiamsanga, MLA, Champhai North A/C, Bamboo Link Road Board Vice Chairman Pu Ramthanmawia, MLA, East Tuipui A/C te bakah Member Secretary Pu James Lalrinchhana, District Bawrhsap, Pu Lalrinawma, PD, DRDA leh CSS khawih Department hrang hrang hotute leh DISHA member dangte an tel a ni.