625/2023-2024

Aizawl 30th May 2023 : Ni li chhung awh tur Horticulture Fair 2023 (30th May-2 June, 2023), Aijal Club Park-a neih chu vawiin khan Dy. Chief Minister, Pu Tawnluia chuan khuallian niin a hawng. Hawnna inkhawm hi RB McCabe Hall, Aijal Club-ah buatsaih niin, Prof. F.Lalnunmawia, Vice-Chairman, Horticulture Development Board leh Dr.K.Pachhunga, Vice-Chairman, Bamboo Development Board te chu khualzahawm an ni a. District tina farmer thawk tha thlanchhuah pakhat theuh hnenah ‘Best Horticulture Farmer’ lawmman he hunah hian hlan nghal a ni.

Dy. Chief Minister Pu Tawnluia chuan ‘Horticulture Fair’ hawnna inkhawmah hian farmer-te leh Horticulture Department thawktute chu Mizoramin ei leh bar a hmasawnna a neih theih nan a thawktu pawimawh tak an nih thu sawiin, hmalakna tur ruahmanna an siamah uluk taka ngaihtuahna seng turin a bik takin department thawktute a chah a. State pawn atanga sawm bik lo kalte chu Mizoramah a lo lawm tih sawiin fair neih leh hunah pawh lo tel zel turin a sawm bawk. Farmer-te hmakhua ngaia Horticulture Department-ten farmer-te inphochhuahna hun an buatsaih thin chu thil chhuanawm tak a ni tiin, fair hlawhtling tak ni turin duhsakna a hlan a ni. Kuthnathawktute chu hnam rohlu an ni tiin an thawhrimna te chu fakawm a ti a, Mizoram hmasawnna sulsutu pawimawh tak an ni tih in hrereng turin a chah a. Mizoramin mahni tharchhuah tam tak a neih thu tarlangin heng mizote kutchhuak ngeite hi ngaihlu a, leisak fo turin Zoram mipuite a ngen a, vawikhat tal he fair tlawh tur hian mizo mipuite a sawm nghal a ni.

Pu Tawnluia chuan kuthnathawktute hmakhua ngaiin sawrkarin theihtawp a chhuah tih tarlangin, SEDP hnuaiah pawh sum tamtak a dah a ni, a ti a. Hlawhtlinna chang turin taima taka thawh a tul tih sawiin farmer te chu thawkrim turin a chah a, an thawhrimnate a thlawn mai loh nan anmahni tanpui leh dawmkang turin sawrkar department-an awm reng a ni, a ti bawk. Thlai, thei leh pangpar hmanga eizawngtute hnathawh chu ropui tiin mizo mipui ten anmahni ngaihsan a hun tawh takzet tih a sawi. Mizoram in leilung hausakna a neih sa hmanga ‘economy’ khaikanna tur remchang a neih langsar ber pakhat chu ‘bamboo development’ a nih thu a sawi a. Mau hmanga Mizoram tihhmasawn chu Chief Minister-pawhin a ngaipawimawh hle a ni, a ti. Hmasawnna hi vawikhatah a lo kal nghal vek thei lo a, dawhthei taka nghah a ngaih chang a awm fo thin tiin dawhtheihna nei turin Zoram mipuite a ngen bawk. Mau chuan tangkaina tam tak a nei tih sawiin, a tuai ei tur bakah mau atanga thil siamchhuah chi hrang hrang tam tak a awm a ni, a ti a. Mizo kutchhuakte chu ngaihlu a lei thin turin mizo mipuite a sawm a ni.

Khuallian chuan market chihnih state chhunga mipui chawmtu tur state chhung market leh hlawkna tak tak tel theihna tur state pawn market a awm thu a sawi a. State pawn a hralh tur chungchangah chuan a kaihhnawih department ten ngaihtuahna uluk taka an sen a tul thu a sawi a. Khawi hmuna hralh nge kan tum, chulai hmuna an rate angin kan zuar ve thei dawn em tih thleng a ngaihtuahna sen a ngai tiin department te mawhphurna a sang hle a ni, a ti. Tun hnai mai khan Sialhawk lakhuihthei chu state pawnah thawnchhuah anih thu a tarlang a, hei hi thil chhinchhiah tlak tak a nih thu sawiin Mizo tharchhuah tam zawk state pawnah thawn thei turin farmer leh state sawrkar hnuaia department-te tan rual a ngai tiin lungrual taka thawk ho thin turin a chah bawk ani.

Khualzahawm Prof. F. Lalnunmawia, Vice-Chairman, Horticulture Development Board chuan Horticulture Department hmalakna hrang hrang chu fakawm a tih thu a sawi a. Tualte Tomato Assam lama thawn chhuah a ni ta chu hlawhtlinna ropui tak a ni, a ti a. Horticulture hnuaia tharchhuah thlai leh thei te chu a sawngbawlna tha zawk nei thei turin sawrkarin hma a lak zel thu a tarlang bawk.

Dr. K. Pachhunga, Vice-Chairman, Bamboo Development Board pawhin thu sawiIn, Mau chu Mizoramin hmasawnna atana leilung hausakna a neih pawimawh tak pakhat a ni, a ti a. Mau atanga siamchhuah thin te tih changtlunna turin sawrkarin hma a la reng a ni, a ti bawk.

Kumin Horticulture Fair-ah hian State pawn atangin Mau atanga thilsiam zuar chhuak thinte sawm niin, stall nei thei pali- Beyond Terry Towels, Maharashtra, Bamboo and Cane Development Institute (BCDI), Agartala, Tripura, National Institute of Design (NID) Bengaluru leh North East Cane and Bamboo Development Council (NECBDC), Burnihat, Assam-te an lo tel thei a. Dr. Susanth CS, (NID) chuan ‘Innovation for the Bamboo Sector in India’ tih thupui hmangin presentation- a pe bawk a ni.

Vawiin ‘fair’ hawnna inkhawmah hian District tin atangin farmer hlawhtling mi pakhat zel thlanchhuahte hnenah ‘Best Farmer Award 2023’ lawmman pek niin, he Award hian lawmpuina thuziak leh pawisa fai cheng sing khat a keng tel a. Lawmman dawngtute chu:

1. C.Lalnunmawia (Dragon fruit & other fruit) – Aizawl District

2. Zohmingthanga (Vegetables)- Mamit District

3. Zakimi (Fruits & Vegetables)-Hnahthial District

4. C.Lalrampara (Grape, oranges, pineapple)-Champhai District

5. Hmingmawia(Mandarin Orange)-Lunglei District

6. Lalmuansanga (Vegetables)-Lawngtlai District

7. Vanalalhruia (Watermelon & Vegetables)-Saitual District

8. C.Lallura (Dragon fruit)-Kolasib District

9. Vanlalsiama (Tomato)-Khawzawl District

10.Vanlalhluti (Vegetables)-Serchhip District

11.C.Beingiachhie (Vegetables & Fruits)- Siaha District te an ni.

Pu L. Lalhmingmawia Pachuau, MHS, Addl. Director, Horticulture Department chuan Technical Report pein ‘Horticulture Fair’ chu kum 2012 atang a hman tan a nih thu a sawi a ,kum 2012-2022 chhunga Stall neitu ten an hralhchhuah tawh zat chu cheng 285,77,358 a ni, a ti a. Kumin hian stall 177 inphochhuakin Pangpar-128, Thei tiak-26, Pot-8, Leitha-4, mimal entrepreneur-5, State pawn-4 leh Department stall-2 te an ni.

Vawiin Horticulture Fair hawnna inkhawm ah hian Pu K. Lalthawmmawia, IAS, Commissioner & Secretary, Horticulture Department chuan kalkhawmte lawmna thu sawiin, Pu C. H. Lalmuanpuia, MHS, Director, Horticulture Department chuan lawmthu sawina neiin hun a khar a ni.