2885/2024-2025

Champhai, 7th November 2024: Vawiin chawhnu dar 01:00 khan Champhai District Disaster Management Authority chu an Chairman District Bawrhsap Pu VL Remliana hovin DC Conference Hall, Keifangtlangah an ṭhukhawm a. November ni 14-a State Level Mock Exercise on Flood and Landslide neih dan tur an thlirho.

Ṭhutkhawm kaihruaitu Pu VL Remliana chuan District Disaster Management Authority chu sawrkarin dan hnuaia a din a nih angin ngaihpawimawh a ṭul thu a sawi a. Chhiatrupna a thlenin mitin ten mawhphurhna kan nei tih sawiin Bawrhsap chuan chhiatrupna a thlen palh thutah inpuahchahna ṭha a pawimawh a, chhiatna thleng tur a tam thei ang ber ven a ṭul a ni, a ti.

Bawrhsap chuan chhiatrupna a lo thleng palh a nih pawhin a neitu bik an awm lova, mi zawng zawng kan ṭan rual a ṭul a ni, a ti a. Sawrkar thuneitute, Village Council, tlawmngai pawl leh mipui zawng zawng te chu he mi kawnga thawhpuiah Bawrhsap hian a sawm a ni.

He hunah hian November ni 14 a State Level Mock Drill on Flood and Landslide Champhai-a neih dan tur sawiho a ni a. Mock Drill hi chawhma dar 11:00 aṭangin neih ṭan tur a ni a, vawiin ṭhutkhawmah hian Mock Drill neih dan tur ruahman niin sawrkar department hrang hrang te chanvo tur ruat fel a ni bawk.

Vawiin ṭhutkhawmah hian sawrkar department hrang hrang - RD, Health & Family Welfare, Police, I&PR, PWD, PHE, P&E, DM&R, Fire & Emergency Services leh Sub Headquarters YMA aiawh te an tel a ni.