291/2023-2024

Champhai, the 2nd May, 2023: District Disaster Management Authority (DDMA), Champhai District chu vawiin chawhnu dar 1 khan an Chairman Pu James Lalrinchhana, District Bawrhsap hovin DC Conference Hall-ah an thukhawm.

Pu James Lalrinchhana chuan kan hma lawka furpui thleng tur laka inpuahchah lawk a pawimawh thu leh, chhiatrupna chu thleng thei reng a nih avangin hetiang hun a thlena chiai mai lova chetlak dan turte pawh inzirtir zau a pawimawh thu a sawi a. Rikrum thlen thulhah mawhphurhna thruhte, tih tur leh tih loh turte hriat bel a pawimawh thu sawiin, member-te chu infinchhuah zel tur leh rawtnate thlen hreh lo turin a chah a ni.

He hunah hian kum 2022-2023 chhunga hmalaknate thlirho a ni a. August ni 1, ni 6-8, 2023 chhunga Mizoram puma lirnghing laka chetlak dan tur nunchan zirna, State Level Mock Exercise on Earthquake Disaster kalpui dan turte, furpui lo thleng tur hmachhawn kawnga inpuahchah dan turte sawiho a ni.

DDMA Champhai Annual report 2022-2023 chungchang Pu VL Hruaimawia DO, DM&R Branch, DC Office Champhai hnen atangin ngaihthlak a ni a. Tarlan a nih dan chuan 2022-2023 chhung hian chenna in 10 a kang a; heng zinga 6 te hi a puma kangral vek niin, a then a zar kang 2 awm bawkin, 2 dangte chu dan lova petrol/diesel kawl avanga kangmei chhuak niin dan tlawhchhanin chhawmdawlna pek an ni lo a. Lirnghing avangin chenna in 1 leh school 1 a chhia a. Ruahsur nasa avanga tuilianin sangha dil 1, agriculture farm 223 a ti chhia a, leimin vangin chenna in 20 a chhe bawk. Leiminin kawng a hnawhpin tum 11 then fai niin, protection wall 1 siam a ni a. Thlipui tleh avangin chenna in 28 leh Agriculture farm chhia 22 report a awm a, kangmei chhuakin horticulture farm 10 a tichhia a. Rial tlain chenna in 1 a tihchhiat bakah ruah bawhawkin agriculture farm 20 a ti chhe bawk a. Chhiatna thleng tuartute hnenah hian dan tlawhchhanin chhawmdawlna pek a ni. Dedicated Covid Health Centre (DCHC), Covid Care Centre (CCC) leh Champhai Fire Station-te hnenah hmanrua pek a ni a. Awareness campaign vawi 17 neih a ni bawk.

August ni 1, ni 6-8, 2023 chhunga lirnghing thlen thulha chetlak dan nunchan zirna, 'State Level Mock Exercise on Earthquake Disaster' kalpui dan turte sawiho a ni a. Nunchan zirna hmun tur 3; Bazarpui, Springdale Academy leh PWD Office te chu thlan an ni a; kalpui dan tur leh mawhphurhna hrang hrangte sawiho a ni bawk.

Thukhawm chuan furpui lo thleng mai tur laka inpuahchah dan turte an sawiho bawk a. Quick Response Team (QRT) training pek te, leimin, tuilian leh thlipui vanga chhiatrupna thlen hluar zualna hmunte zirchian ni se, a tul anga hmalak dan tur duan ni se tih a ni a. Silpaulin leh hmanraw mamawh neih dante enfiah a, a tul anga hmalak ni se tih a ni bawk.