290/2023-2024

Kolasib dated 2nd May 2023: Vawiin khan Er. Lalrinawma, Minister, Social Welfare & Tribal Affairs Department chuan Jordan Centre, Sețhawn thlawhin thawktute leh enkawl mekte kawmna hun a hmang a. Pu K.Laldawngliana, MLA, 4-Tuirial bialtu, SEDP Social Rehabilitation Board member leh Pi Zodingpuii, Director, Social Welfare & Tribal Affairs ten Minister hi țawiawmin Jordan Centre tih changtlun lehzual nana hmalak dan turte sawi ho a ni.

Social Welfare & Tribal Affairs Minister Er. Lalrinawma chuan ruihtheih thil chu ram leh hnam hmelma hlauhawm tak a nih angin ruihhlo lak a fihlim tur a inenkawlna hmun, Jordan Centre kan neih chu țangkai tak a hman a țul thu a sawi a. Sim tak takna nun nei tur chuan mahni inhnehna nun leh mahni inthunun theihna nun neih a pawimawh thu sawiin beiseina nen a Jordan Centre pantute beiseina tihhlawhtlin a nih theih nan thawktute chuan inpekna thuk tak nen an hna kalpui turin a fuih bawk a ni. Hma lam hun hlimawm leh nuam siam tur chuan kan tun hun hman dan a pawimawh thu Social Welfare Minister chuan sawiin Jordan Centre-an awm chhungin insiamțhat tumna rilru nei chung a hun awl hmang țhat zir turin a chah a, chhungkua leh khawtlang tan a mi țangkai ni tura intuaithar turin a fuih bawk a ni.

Pu K.Laldawngliana, MLA pawhin Jordan Centre-a awmte fuihna thu sawiin an vanglai hun țha te țangkai zawk a an hman theih nan Jordan Centre an chhuahsan hun ah pawh bulțan țhat duhna thinlung chhuahpui ngei turin a chah a, ruihhlo ngaite chhanchhuahna kawng a Jordan Centre-a thawktute hnathawh chu fakawm a tih thu a sawi bawk a ni.

Minister hian Jordan Centre a tlawh zawh hian 'After Care Home', Thingdawl tlawhin hmalakna kalpui dan tur te a enpui a. Ministry of Tribal Affairs kaltlang a sak, Eklavya Model Residential School, Bilkhawthlir sak mek chu a hmun ah a endik nghal bawk a ni.

Jordan Centre, Sețhawnah hian February ni 7, 2022 ațang khan ruihhlo avanga harsatna tawk te enkawlna kalpui țan niin vawiin thleng hian mi 402 enkawl an ni tawh a. Thla 2 chhung enkawlna kalpui țhin niin thawktu, Honorary Workers 41 leh thawktu nghet 15 an awm mek a ni. Thawktute chuan Centre awmchilh tur Doctor an mamawh thu te, mamawh zual lam khawmna tur lirthei leh Centre-a enkawl laite taksa insawizawina tur khelmual an mamawh thu te an lo thlen a ni.

Eklavya Model Residential School, Bilkhawthlir hi Ministry of Tribal Affairs ațanga Rs. 24 Crore bawr vel hmang a sak mek a ni a, building 11 sak mek niin kumin chhungin sak zawh hman beisei a nih thu thawktute chuan an sawi a. Tribal tan a duan bik niin class 6 atanga class 12 tan Arts, Science leh Commerce zirna awm tur a duan a ni. Mizoram chhung khaw 6 ah Eklavya zirna in hi kalpui mek niin Bilkhawthlir bak ah hian Tlangnuam, Zawlnuam, Siaha leh Tlungvelah Eklavya Model Residential School sak hna kalpui mek a ni a, khaw 6 ah sak belh turin ruahmanna kalpui mek a ni bawk.