573/2025-2026

Champhai, 13th May 2025: Vawiin chawhma dar 10:00 khan Champhai District Disaster Management Authority chu an Chairman, Bawrhsap Pu Mohammad Aaquib-a hovin DC Conference Hall, Keifangtlangah an thu khawm a. Chhiatrupna leh rikrum thila Champhai District inpuahchahna te an thlirho a ni.

Thutkhawmah hian Champhai District Civil Defence Action Plan duan anih tawh thu tarlan a ni a. Rikrum thila mipui ten inpuahchah dan an thiam theih nan naktuk, May ni 14, 2025 (Nilaini) zan dar 09:00 – 09:05 inkar hian Blackout Drill Champhai khawpui chhungah neih turin an rel a. He mi hun chhung hian veng tin tlangau atangin Siren a rik hnuah power supply tihtawp a ni ang a, inverter, power backup leh solar hmang eng te pawh tih thih vek tur a ni. Motor kawngpuia kal te pawh an awm hmunah dingin an engine leh light te an tihlum rih dawn a ni. He thupek hian damlo phur leh he mi kaihhnawiha che chhuak te chu he thupek hian a huam dawn lo a ni.

He hunah hian chhiatna leh rikrum thila tanpuina mamawhtu te tan Champhai Bawrhsap pisaah District Control Room buatsaih a ni tih tarlan a ni a. Control Room hi engtiklai pawhin (24*7) mamawhtu te tan a hnuaia phone number-ah te hian biakpawh theih reng an ni.

1.    8119081898

2.    6909285995

3.    9862767718

Vawiin thutkhawmah hian Champhai SP Pu Shivendu Bhushan, Addl DC Pu K Zorammuana bakah sawrkar department aiawhte leh khawtlang hruaitute an tel a ni.