1349/2023-2025 

Champhai the 2^nd August, 2023 – 2^nd Special Summary Revision of Photo Electoral Roll, 2023 hmalakna kal zelah vawiin khan Champhai District Election Officer & Deputy Commissioner Pu James Lalrinchhana chuan Assembly Constituency pathum awmna Champhai District Draft Electoral Roll, 2023 a tlangzarh a, Political Party-te hnenah Roll hi a hlan nghal bawk a ni.

Champhai District Draft Electoral Roll, 2023 tlangzarhna, DC Conference Hall Keifangtlanga neihah hian election kawihhnawih sawrkar official-te, Champhai MJA hruaitute, tlawmgai pawl aiawhte leh political party hrang hrang aiawhte an tel a ni.

Champhai DC & DEO Pu James Lalrinchhana chuan Champhai District Draft Electoral Roll a hun taka peih fel tura buaipuitu election kaihhnawih official-te thahnemngaihna leh thawhrimna chu fakawm a tih thu a sawi a. India khua leh tui vote nei thei chin kan nih chuan vote thlak hi kan dikna chanvo leh kan mawhphurhna pawimawh tak a ni tiin kum tling tharte leh midang roll a hming la thun lut lo te pawh he Summary Revision hun chhung hian inziak lut ngei turin a sawm a. Kan hma lawka Mizoram Assembly Election kan hmachhawn tur chu a hlawhtlin ngei theihnan electoral roll dik leh felfai tak kan neih a tul hmasa a ni tiin, Draft Roll publish tak chu mipuite pawhin uluk taka lo zirchiangin, an hming, address leh particular dangte a dik ngei em tih lo finfiah theuh turin District mipuite a sawm a. Election kaihhnawih hmalakna ah te official-te, NGO-te leh khawtlang hruaitute thahnemngaihna a fakawm thin takzet a ni tiin Champhai DC hian thawhho pui zelah a sawm bawk a ni. 

Champhai Election Officer Pu Benjamin Zalawma Ralte chuan Champhai District Draft Electoral Roll chungchang report tlangpui a pe a.

Champhai District Draft Electoral Roll, 2023 in a tarlan danin tun dinhmunah Champhai District ah voter 56,438 (mipa 27,560 leh hmeichhia 28,878) an awm mek a, Roll hmasa dated 13/01/2023 atangin voter 76 in a pun belh a ni. Assembly Constituency pahnih 23 Champhai North leh 24 Champhai South ah te hmeichhe voter tam zawkin District pumpui chawh rualin voter mipa 1000 zelah hmeichhe voter 1048 an awm a ni.

Vawiin Draft Electoral Roll tlangzarh anih atang hian roll a luh dilna leh tih danglam dilna (Filing of claims and objections) chu hawn nghal niin August ni 31, 2023 (Thursday) thleng hawn a ni a. October ni 1, 2023 a kum 18 tling hman te tan electoral roll a luh dilna hi a thehluh theih a ni. Mizoram Assembly Election, 2023 a hman tur Electoral Roll Final Publication chu October ni 4, 2023 ah neih a ni ang.