1903/2024-2025

Champhai, 4th September 2024: Vawiin chawhnu dar 1 khan Champhai District Education Committee chuan an Chairman Bawrhsap Pu VL Remliana kaihhruaiin zirtirtu thawk tha chawimawina (State Teachers’ Award 2024) dawngtu Pu C. Lalhrilliana, Govt. Vengthlang Middle School Champhai lawmpuina hun an hmang.

Lawmpuina hun Champhai DC Conference Hall, Keifangtlanga neihah Pu VL. Remliana chuan zirtirtu tha chawimawiina dawngtu Pu C.Lalhrilliana Champhai District-in an nei chu lawmawm a tih thu leh chhuanawm a tih thu a sawi a. He chawimawina dawng tura a thawhrimna leh inpekna hian District chhung zirtirtute-ah chona nasa tak, zirna tihhmasawn leh chawisan kawnga tan lak duhna thinlung thar siam se a duh thu a sawi bawk.

District Education Committee (DEC) Chairman chuan DEC-ah tawn hriat ngah tak tak State Awardee leh National Awardee-te thlenga an awm chu lawmawm a tih thu sawiin, DEC chu rualawhna dik nena kalpui a ngai a, District tihmingtha thei turte thlithlaia chherchhuah kawngah tan lak a tul a ni, a ti.

State Awardee Pu C. Lalhrilliana, Teacher, Govt. Vengthlang Middle School pawhin thu sawiin, State Awardee ni thei tura a kalkawngte a sawi a. District Education Committee, Selection Committee leh thahnemngai taka amah thlawpa tawiawm thintute chungah lawmthu a sawi bawk.

He hun hi DEC Member Secretary Pu ,C. Lalbiakzauva DEO & DPC, Samagra Shiksha, Champhai District chuan a kaihruai a. DEC Chairman-in Pu C. Lalhrilliana hnenah lawmpuina thuziak cheimawi leh pawisafai a hlan a. Kalkhawmte atangin thusawi ngaihthlak a ni bawk.

Lawmpuina hun hman zawh hian District Education Committee chuan thutkhawm a nei zui nghal a. Samagra Shiksha, Champhai District-in kum 2023-2024 chhunga an achievement report ngaihthlak niin kum 2024-2025 a hmalakna tur Project Approved Board in a lo pawm tawh chu hmalak theih tura pawm a ni bawk. Drining Water Facility leh Toilet Convergence chungchang pawh sawiho niin District Rural Development Authority (DRDA) te nen thawhho dan kawng zawn a, sikul tin ten tui thianghlim in tur leh inthiarna ṭha an neih theih nan hmalak ni se tiin an rel a ni.

He hunah hian ICT intervention hnuai atanga sawrkar enkawl Primary Sikul tin te hnena sem tur Tablet chu Pu VL Remliana chuan School aiawh Block Resource Center (Champhai leh Khawbung ) te hnenah a hlan bawk a ni.