1904/2024-2025

Dated Hnahthial, the 4th September, 2024: Vawiin khan Hnahthial DC Meeting Hall-ah Bawrhsap, Pi Rita Lalnunmawii Pachuau kaihhruaiin Hnahthial District Task Group on Myanmar Refugees thutkhawmna neih a ni a. VC, NGO leh Sawrkar department hrang hrang atang raltlan dinhmun leh raltlan enkawlna kawnga an harsatnate sawi hona hun neih a ni.

Thutkhawmna kaihhruaitu Pi Rita Lalnunmawii Pachuau chuan thutkhawmna neih anih chhan chu tun hnaia Hnahthial District chhunga Burma raltlante dinhmun leh khawtlang an nghawng dan en hona leh zirchianna neih a ni a ti a. Raltlan ho chu kan unau, kan thisen zawmpuite an nihna anga tha taka lo dawnsawn chu kan mawhphurhna pawimawh tak anih thu kalkhawmte hnehah chuan sawiin VC leh tlawmngai pawl hrang hrang ten ngai pawimawh a tha taka an lo enkawl thin chu lawmawm a tih thu a sawi a. Ramri in min daidang mah se kan lo dawnsawn dan atangin kan in unauna chu a la nghet reng zel a ni tiin rawn kal khawmte hnenah an hmalak tawhna te fakawm a tih thu a sawi.

Department hrang hrang atang Burma raltlante anmahni huam chhung theuhva an dinhmun report ngaihthlak a ni a. Chief Medical Officer chuan raltlante hnenah an kum mila dawn tur hrang hrang, a bikin vaccine te chu pek thin an nih thu sawiin raltlan ho zingah nau pai an tam thu a sawi a. PHE lam atang pipeline lamah harsatna an neih dan te ngaihthlak niin P&E lam atang raltlan chhungkaw hrang hrang hnena current an pek dan te ngaihthlak a ni bawk.

District Education Officer hnen atang kum 2024-25 inkara raltlan sikul naupang dinhmun ngaihthlak a ni a. Tun dinhmunah chuan raltlan ho chu Primary school ah hmeichhia leh mipa 52 ve ve an awm a; Middle school (class 5-8)-ah mipa 42 leh hmeichhia 39 awmin High school leh Higher seconday school-ah mipa 8 leh hmeichhia 22 an awm thu a sawi a. Raltlan naupangte hi tun dinhmunah uniform leh text book la lei kep thin an nih thu a sawi bawk.

Child Development Project Officer chuan raltlan ho chu Aadhar card an neih ve loh avangin Poshan Tracker-ah thun luh theih an nih ve loh thu sawiin a hranpa a raltlan tan sanction a awm loh avangin naupang kum ruk (6) chin hnuai lam chu nutrition-ah an kep thin thu a sawi.

Thutkhawmaah hian Hnahthial VCP hrang hrang- Thingsai, Ngharchhip, New Ngharchhip, Tarpho, Khawhri, Hnahthial North-I, North-II, South –I, South-II leh South -III hnen atang an mahni bial thueuhva raltlan awm zat leh an dinhmun ngaihthlakna hun neih niin tun dinhmunah chuan raltlan zingah buaina siam leh khawtlang tana hnawksak ti a sawi tur an awm rih loh thu an sawi a ni. VC area hrang hranga raltlan awm zat chu tiang hi a ni : Thingsai- Mi 275 vel; Ngharchhip – Mi 23;Tarpho – mi 27; Khawhri – chhungkua 7; North-I –mi 33; North –II – mi 17; South –I – mi 22; South II – mi 22 leh South-III ah raltlan mi 76 chu tun dinhmunah an awm mek a ni.

Bawrhsap chuan he thutkhawmna ami te chu sawmna ngai pawimawha an rawn kal khawm chu lawmawm a tih thu sawiin an mamawh hrang hrang, a bikin silpauline leh buhfaite chu phuhru turin hma an lak tur thu a sawi a. Bawrhsap chuan raltlante chu kan unaute ni mahse an duh ang anga an pem kual loh nan YMA pem lehkha an lak zel ngei theih nan khauh taka kalpui turin kalkhawmte chu a chah a. Raltlante chu kan khawtlang dinhmun tihbuai tir kan phal tur a ni lo tiin a tul anih chuan khauh zawka kan enkawl dan kalpui pawh a tul thu a sawi. “Hnahthial District Task Group on Myanmar Refugees” chu huapzo zawka kalpui anih theih nan “ Hnahthial District Level Committee on Refugees” ti a thlak ni thei se a duh thu a sawi bawk.

Additional SP Pu Beimosia Lapi chuan thu sawiin crime record en chuan Hnahthialah bik chuan Raltlante avanga buaina neih a la awm loh thu sawiin chutih rual chuan Hnahthial, a bik takin Thingsai leh New Ngharchhip-te chu drugs luhka a nih theih avangin chutiang hria an awm chuan a rang thei ang bera police hnena report tura a duh thu a sawi a ni.

Hnahthial BDO, Pu Hmingmawizuala chuan raltlante chu kan unaute an nihna anga ka lo enkawl rualin drugs leh ruihhlo rawn tawlh ruk lakah kan fihlim zawk theih nan kan enkawl danah khauh zawkin hma lak a ngaih thu a sawi bawk.

Election Officer, Pi Esther Leihang chuan roll revision neih hunah kalkhawmte chu fimkhur leh dik taka thun thin tura chahin raltlante chu kan unaute an nih rual rualin India khua leh tui an nih ve loh avangin electoral roll-ah tel lo turin VCP kal khawmte chu a chah nghal a ni.